सीताष्टकम् रत्नपञ्चकम् २
(रत्नपञ्चके द्वितीयं रत्नम् ।)
सीता सदा प्रकृतिरेव परात्मशक्ति-
र्वागीश्वरी सकलवेदमयी प्रपूर्णा ।
श्रीरामचन्द्रचरणे सततं विलीना
मायामयी निखिलदेवमयी वरेण्या ॥ १॥
सत्याऽमृता संसृतिबीजरूपा
साकाररूपं सकलं दधाना ।
श्रीरामसान्निध्यवशात्स्वतन्त्रा
ज्ञेया मनुष्येन्द्रसुरासुरैश्च ॥ २॥
महामाया सीता निखिलजगदुत्पादनकरी
महालक्ष्मीर्देवी सकलफलदात्री त्रिभुवने ।
क्रियाशक्तिः साक्षादनवरतविद्यानिधिपरा
निमेषोन्मेषात्सा भुवनलयकर्त्री जनकजा ॥ ३॥
नित्यानन्दा परमसुखदा नित्यतृप्ता प्रसन्ना
पञ्चभ्रान्तिप्रणिरसनतश्चात्मबोधप्रदात्री ।
विद्याविद्यासकलभवभीभ्रान्तिभेदप्रहन्त्री
सर्वोत्कृष्टा हृदयकमले जानकी मे सदाऽस्ति ॥ ४॥
भद्रा दुर्गा ज्ञानविज्ञानरूपा ॥
शान्ता काली भुक्तिमुक्तिप्रदात्री ।
नित्या पूर्णा विश्वमाताऽऽत्मविद्या
लब्धा सीता शारदा वेदमाता ॥ ५॥
तुरीयातीता मा परमवरदा श्रीश्च धनदा
विधात्री सावित्री सकलसुखदात्री ह्यभयदा ।
सकामानां भीतिर्न तु भवभयं स्वात्मसुखिनां
सुसौख्यं चित्पूर्ण भजति मनुजो मातृकृपया ॥ ६॥
वेदान्तार्थस्वरूपा परमसमरसा व्यापिनी ज्ञप्तिरूपा
रुद्रादित्यादिरूपाऽखिलविधसुखदा मोक्षदा ज्ञानगङ्गा ।
मुक्तालङ्कारयुक्ताऽभयवरदकरा सिद्धिदा रामपत्नी
पद्माक्षी पद्महस्तामलतमवपुषी सन्ततं शं तनोतु ॥ ७॥
सीता सिता प्रभवदा प्रणवात्मिकेयं
प्राणेश्वरी परतमा परमाऽन्नपूर्णा ।
सूर्येन्दुशक्रशिवरामसुदेहधात्री
चिच्चेतनामतिकलास्वसुखैकदात्री ॥ ८॥
कल्याणसेवकहृदिस्थसरस्वती या
सीता प्रभा कमलजा भगवत्प्रिया मा ।
व्यक्ता सुवाक्सकलकामदुहा च धेनुः
सर्वान्सदा विमलभक्तजनान्प्रपातु ॥ ९॥
इति श्रीसमर्थरामदास-कल्याणपदान्वित-
कल्याणसेवकप्रणीत रत्नपञ्चके द्वितीयं रत्नं सीताऽष्टाकं सम्पूर्णम् ।
-
Proofread by Brahatha Mohan