Sharadashtaka Stotram

शारदाष्टकस्तोत्रम् ५

शङ्खेन्दुकुन्दहिमसन्निभचारुदेहां हंसस्थितां कमलपत्रसुरोचनीयाम् । दिव्याम्बराभरणभूषितसौम्यरूपां श्रीशारदां भगवतीं सततं नमामि ॥ १॥ संसारसागरमहोदधिमग्नसत्त्व- सन्तारिणीं सुरनरार्चितपादपद्माम् । हारार्द्धहारमणिकुण्डलमण्डिताङ्गीं श्रीशारदां भगवतीं सततं नमामि ॥ २॥ या भारतीति कथिता जननी च लोके मोहान्धकारभरभग्नकृतां जनानाम् । सङ्कीर्तिता मुनिभिरस्तसमस्तदोषैः श्रीशारदां भगवतीं सततं नमामि ॥ ३॥ वीणानुवादनरतां स्फटिकाक्षमाला- सन्धारिणीं कनकपुस्तकधारिणीं च । रत्नैः शुभैः सुरुचिरां कृतहस्तपद्मां श्रीशारदां भगवतीं सततं नमामि ॥ ४॥ पूज्या सदैव जननी परिवन्दनीया देव्या गणा मनसि सम्परिमोदनीयाः । जीवार्थिनः फलभृतो गुणवर्णना च श्रीशारदां भगवतीं सततं नमामि ॥ ५॥ नत्वा भजेज्जगति यो जननीं प्रसिद्धां कुर्यात्सदा भगवती किलपञ्चसौख्यम् । सौन्दर्यरूपगुणवित्तसुभोगभाजं श्री शारदां भगवतीं सततं नमामि ॥ ६॥ पूजोपहारवलिभिः परिपूजनीया देव्या गणादिकमनोज्ञसुवक्त्रपद्माः । यैः पूजिता भगवती किल जाड्यहन्त्री श्रीशारदां भगवतीं सततं नमामि ॥ ७॥ यस्याः प्रसादमवगम्य सुखप्रदाया- स्त्रैलोक्यनाथौदितार्कसमप्रभः स्यात् । धर्मार्थकामफलदामथ मोक्षदां च श्रीशारदां भगवतीं सततं नमामि ॥ ८॥ इति श्रीशारदाष्टकस्तोत्रं सम्पूर्णम् ॥