Shri Sharada Svarnaratha Samarpana Padyavalih

श्री-शारदा-स्वर्णरथ-समर्पण-पद्यावलिः

श्रीशङ्करगुरूत्तंससमर्चितपदाम्बुजे । शारदे रथमारोह सौवर्णं सर्वमङ्गले ॥ १॥ स्वर्गादिसुखसन्दात्रि स्वर्णसच्छायविग्रहे । स्वर्णस्यन्दनमारुह्य सर्वान् पालय शारदे ॥ २॥ भक्तिप्रिये भद्रदात्रि भक्तानामभयप्रदे । भक्त्या समर्पयाम्येनं जाम्बूनदमयं रथम् ॥ ३॥ हिरण्यगर्भवामाङ्गि हरिदश्वादिसेविते । हिरण्यरथमारोह हिताय जगतां सदा ॥ ४॥ कनकाभरणैर्युक्ते कविताविभवप्रदे । कार्तस्वरमयं मातः आरोह रथमुत्तमम् ॥ ५॥ इति श्री-शारदा-स्वर्णरथ-समर्पण-पद्यावलिः सम्पूर्णा ।