दक्षकृतं शक्तिस्तोत्रम्
॥ श्रीगणेशाय नमः ॥
दक्ष उवाच ।
ततस्तां प्रणनामाथ तुष्टाव प्रकृताञ्जलिः ।
नमस्ते शक्तिरूपायै मायामोहस्वरूपिणि ॥ २७॥
जगद्धात्र्यै नमस्तुभ्यं जगन्मातर्नमो नमः ।
सर्वेषां प्राणदात्र्यै ते सर्वरूपिणि ते नमः ॥ २८॥
अनाद्यै चादिभूतायै पार्वत्यै ते नमो नमः ।
गायत्रिका श्रीसावित्रीरूपायै ते नमो नमः ॥ २९॥
प्रकृत्यै पुरुषाख्यायै नामरूपप्रकाशिनि ।
निर्गुणायै गुणानां वै धारिकायै नमो नमः ॥ ३०॥
प्रसीद भव मे पुत्री दाक्षायणि नमो नमः ।
ततस्तं पार्वती प्राह भक्तं दक्षप्रजापतिम् ॥ ३१॥
(फलश्रुतिः)
शक्तिरुवाच ।
भविष्यामि सुता तेऽहं नानारूपधरा सुत ।
जगच्च पूरयिष्यामि जनयित्वा सुताः सुतान् ॥ ३२॥
त्वया कृतं मदीयं यत्स्तोत्रं ख्यातिं गमिष्यति ।
सर्वकामप्रदं पूर्णं पठते शृण्वते भवेत् ॥ ३३॥
इति दक्षकृतं शक्तिस्तोत्रं सम्पूर्णम् ॥
- ॥ मुद्गलपुराणं द्वितीयः खण्डः । अध्यायः ५ । २.५ २७-३३॥
- .. mudgalapurANaM dvitIyaH khaNDaH . adhyAyaH 5 . 2.5 27-33..
Proofread by Yash Khasbage, Preeti Bhandare