Sharmavatikritam Parvati Stotram 8

 शर्मवतीकृतं पार्वतीस्तोत्रम् ८ 

``नमस्ते शाङ्करि रक्षाकरि प्राणातिवल्लभे ॥ ८०॥

सर्वकामप्रदे सत्ये भक्ताया हृदयङ्गमे ।
नमस्तेऽष्टगुणैश्वर्यवत्यै सत्यै नमो नमः ॥ ८१॥

ध्यायन्ति योगिनस्त्वां चार्चयन्ति स्नेहवस्तुभिः ।
सम्यग्भावात्मकैः पुष्पैरर्चयामि महेश्वरि'' ॥ ८२॥

इत्युक्त्वा प्रणनामाथ पार्वती तामुवाच ह ।
परितुष्टाऽस्मि ते पुत्रि वरं प्रार्थय वाञ्छितम् ॥ ८३॥

विषकन्या तदोवाच सर्वं जानासि चेश्वरि ।
भर्तुरर्थे मया सर्वः कृतोऽयं तपउद्यमः ॥ ८४॥

तत्किं तेन करिष्यामि साम्प्रतं जरयाऽऽवृता ।
वसाऽत्र पार्वति नित्यं कन्यानां शुभदा भव ॥ ८५॥

इत्युक्ता पार्वती तथास्त्विति प्राह ततः परम् ।
पस्पर्श पाणिना कन्यां चकार नवयौवनाम् ॥ ८६॥

उवाचोनषोडशाब्दां दिव्या चम्पकसदृशीम् ।
वद कन्ये वरारोहे किमिष्यते ततः परम् ॥ ८७॥

कन्याऽऽह मातः शम्भोर्मे दर्शनं कारय प्रभोः ।
सती प्राह समागच्छ कैलासं सिंहसंस्थिता ॥ ८८॥

इत्युक्ता सा शर्मवती ययौ कैलासमेव तु ।
दृष्ट्वा च शङ्करं साध्वी लब्ध्वा मन्त्रं तु वैष्णवम् ॥ ८९॥

``ॐ नमः श्रीकृष्णनारायणाय स्वामिने नमः'' ।
कण्ठे च तुलसीमालां गृहीत्वा सात्त्वती तदा ॥ ९०॥

अभवद्वैष्णवी कन्या नारायणपरायणा ।
अन्ते नारायणं लब्ध्वा पतिं मुक्तिं जगाम सा ॥ ९१॥

इत्येवं कथितं लक्ष्मि! शर्मवत्याः शुभावहम् ।
तापस्याः शुक्लचरितं विषकन्यातपः परम् ॥ ९२॥

इति श्रीलक्ष्मीनारायणीयसंहितायां प्रथमे कृतयुगसन्ताने ४९०-अध्यायान्तर्गतं
शर्मवतीकृतं पार्वतीस्तोत्रं सम्पूर्णम् ।

लक्ष्मीनारायणीयसंहिता । खण्ड १। अध्याय ४९०/८०-९२॥


lakShmInArAyaNIyasaMhitA . khaNDa 1. adhyAya 490/80-92..

Proofread by PSA Easwaran