शिवविष्णुकाञ्चीस्तुतिः
%८८
काञ्चीपुरीमहं मन्ये काञ्चिदेकां विभोः कलाम् ।
विकला अपि यद्योगा सकलात्मत्वभाजनम् ॥ १॥
काञ्ची यथा हि वस्त्रोर्ध्वं युवते राजते कटौ ।
काञ्ची तथाब्धिवस्त्राया वस्त्रप्रान्ते विराजते ॥ २॥
पञ्चमी मुक्तिपुर्येषा पञ्चमी योगभूरिव ।
पञ्चता तस्य न पुनः पञ्चतात्रास्य जन्मिनः ॥ ३॥
शिवविष्णुपुरी काञ्ची कांश्चिच्चित्तां हरेन्न किम् ।
न किञ्चिदपि यद्दृष्ट्या पापं तिष्ठति देहिनाम् ॥ ४॥
वाराणसी ह्युदक्काशी पापराशीविनाशिनी ।
तथा दक्षिणकाशीयं मुक्तिद्वारमपावता ॥ ५॥
अतिवेगवतीयमवाच्यां वेगवती सरिदत्र हि काञ्च्याम् ।
सतिवेगवती गुरुगीता वेगवतीं भिदमात्मनि कुर्यात् ॥ ६॥
एकाभ्रकेशाभिधभूमिलिङ्गं कामाभ्यभीष्टार्थदमात्मलिङ्गम् ।
सपद्यविद्यावरणं निरस्य प्रदर्शय त्वात्मनि मे चिरस्य ॥ ७॥
वरदराजवरावितदुर्हृदं वरदराजमुपाश्रितसद्धृदम् ।
वरदरारिकरं प्रणमाम्यजं वरदरान्तकरं तमधोक्षजम् ॥ ८॥
परिहृतविनतार्तिर्वारितस्वीयजूर्ति-
र्भुवनरुचिरमूर्तिर्भक्तकामप्रपूर्तिः ।
जयति वरदराजो भक्तचित्तानुवर्ती
निजभजकपतिर्दिङ्मालिनी यस्य कीर्तिः ॥ ९॥
इति श्रीवासुदेवानन्दसरस्वतीविरचिता श्रीशिवविष्णुकाञ्चीस्तुतिः समाप्ता ।