त्रैलोक्यमोहनश्रीसीताकवचम्
श्रीलक्ष्मण उवाच ।
कृताञ्जलिपुटो भूत्वा नत्वा शिरसि लक्ष्मणः ।
उवाच परमं दिव्यं सीतायाः कवचं परम् ॥ १॥
त्वत्तः श्रोतुमिच्छामि त्रैलोक्यमोहनं महत् ।
कथयस्व रघुश्रेष्ठ दिव्यं कवचमुत्तमम् ॥ २॥
श्रीराम उवाच ।
श्रृणु वत्स महादिव्यं महामङ्गलदायकम् ।
महासिद्धिकरं पुंसां महासम्पत्तिदायकम् ॥ ३॥
त्रैलोक्यमोहनं नाम कवचं परमाद्भुतम् ।
यः पठेत्सततं भक्त्त्या अपुत्रः पुत्रवान् भवेत् ॥ ४॥
अष्टाक्षरं महामन्त्रं पठेत् कवचसंयुतम् ।
ततः सिद्धिमवाप्नोति अकीलमतुलं वरम् ॥ ५॥
ॐ अस्य श्रीसीतात्रैलोक्यमोहनकवचमन्त्रस्य श्रीरामऋषिरनुष्टुप्
छन्दः श्रीसीतादेवता श्रीसीताप्रीत्यर्थे जपे (पाठे) विनियोगः ॥
ध्यानम् -
नीलाम्भोजदलाभिरामनयनां नीलाम्बरालङ्कृतां
गौराङ्गीं शरदिन्दुसुन्दरमुखीं विस्मेरबिम्बाधराम् ।
कारुण्यामृतवर्षिणीं हरिहरब्रह्मादिभिर्वन्दितां
ध्यायेद्भक्तजनेप्सितार्थफलदां रामप्रियां जानकीम् ॥
ॐ शिरो मे भूभवा पातु ललाटे जनकात्मजा ।
नेत्रे पातु कुजा चैव वैदेही श्रुतिरक्षिणी ॥ १॥
जिह्वां मे जानकी पातु ग्रीवां जनकनन्दिनी ।
स्कन्धौ पातु महामाया भुजौ पातु सुलोचना ॥ २॥
करौ पातु सदा सीता हृदयं रामपार्श्वगा ।
मध्यं पातु च पद्माक्षी नाभिं मे वनवासिनी ॥ ३॥
कटिं योगेश्वरी पातु सक्थिनीं मृगध्वंसिनी ।
उरू मे पातु वैदेही जानुनी भिल्लमोक्षिणी ॥ ४॥
जङ्घे बालिप्रमाथिनी चतुष्पदी दैत्यनाशिनी ।
सर्वाङ्गं पातु स्वच्छाङ्गी सदा पातु प्रबोधिनी ॥ ५॥
विभीषणश्रीदा पातु सद्यश्चैव दिशो दश ।
सीतायाः कवचं ह्येतद्देवानामपि दुर्लभम् ॥ ६॥
त्रैलोक्यमोहनं नाम त्रैलोक्यधनदायकम् ।
मुच्यते सर्वपापेभ्यो निर्वाणमधिगच्छति ॥ ७॥
अश्वमेधायुतफलं पठनाल्लभते नरः ।
नित्यं पठति भक्त्या यः तस्य सीता प्रसीदति ॥ ८॥
राज्यलाभो भवेत्तस्य मम भक्तिश्च पुष्कला ।
यः पठेत्तु ममाग्रे वै पूजाकाले प्रयत्नतः ।
सौमित्रे च श्रृणुष्व त्वं ददामि वाञ्छितं फलम् ॥ ९॥
अष्टाक्षर मन्त्रः ।
॥ ॐ ह्रीं श्रीं सीतायै नमः ॥
अयुतं जपेन्मन्त्रं सर्वसिद्धि प्रदायकम् ।
वटवृक्षतटे पाठे अष्टादशशतेन च ॥ १०॥
षट्विप्रकृते जाप्यम् ॥ १८०० ॥ त्रिशतेन पृथक् पृथक् ॥
एवं नित्यं कृते चैव वर्षपर्यन्त मानवः ।
क्षीराज्यशर्करा हव्यं गोधूम हृदयं पचेत् ॥ ११॥
भोज्यमाहार एकश्चभूमिशायी जितेन्द्रियः ।
ब्राह्मणे दक्षिणांदत्वा नानालंकारवस्त्रदः ॥१२॥
स्वधर्मनिरतः प्राणी अहिंसा सत्यवाक् पटुः ।
एकचित्तो भवेत्तस्य कवचं स्फूर्तिसंयुतः ॥१३॥
अपुत्रो लभते पुत्रं सत्यं श्रीरामभाषितम् ।
अयुतमेक पाठे च पुरश्चर्यं प्रसूतिकम् ॥१४॥
साक्षात्कल्पतरुः सीता ध्यायते यदि लक्ष्मण ।
वाञ्छितं वरदासद्यः सत्यं सत्यं वदाम्यहम् ॥१५॥
इति श्रीरुद्रयामल तन्त्रे श्रीरामलक्ष्मणसम्वादे
श्रीरामविरचितं त्रैलोक्यमोहनश्रीसीताकवचं सम्पूर्णम् ॥
श्रीसीतात्रैलोक्यमोहनकवचं
Encoded and proofread by Mrityunjay Pandey