॥ त्रिपुरसुन्दरीषोडशोपचारपूजा ॥

श्रीगणेशाय नमः । कल्पलतादिसुरद्रुमवाटीकल्पितरत्नगृहाधिनिवासाम् । कल्पशतार्जितपुण्यविशेषाच्चेतसि भावनयाहमुपासे ॥ १॥ एणधराश्मकृतोन्नतधिष्ण्यं हेमविनिर्मितपादमनोज्ञम् । शोणशिलाफलकं च विशालं देवि सुखासनमद्य ददामि ॥ २॥ ईशमनोहररूपविलासे शीतलचन्दनकुङ्कुममिश्रम् । हृद्यसुवर्णघटे परिपूर्णं पाद्यमिदं त्रिपुरेशि गृहाण ॥ ३॥ लब्धभवत्करुणोऽहमिदानीं रत्नसुमाक्षतयुक्तमनर्धम् । रुक्मविनिर्मितपात्रविशेषेष्वर्घ्यमिदं त्रिपुरेशि ददामि ॥ ४॥ ह्रीमिति मन्त्रजपेन सुगम्ये हेमलतोज्ज्वलदिव्यशरीरे । योगिमनःसमशीतजलेन ह्याचमनं त्रिपुरेऽद्य विधेहि ॥ ५॥ हस्तलसत्कटकादिसुभूषा आदरतोऽम्ब वरोप्य निधाय । चन्दनवासितमन्त्रिततोयैः स्नानमयि त्रिपुरेशि विधेहि ॥ ६॥ सञ्चितमम्ब मया ह्यतिमूल्यं कुङ्कुमशोणमतीव मृदुत्वम् । शङ्करतुङ्गतराङ्कनिवासे वस्त्रयुगं त्रिपुरे परिधेहि ॥ ७॥ कन्दलदंशुकिरीटमनर्घं कङ्कणकुण्डलनूपुरहारम् । अङ्गदमङ्गुलिभूषणमम्ब स्वीकुरु देवि पुराधिनिवासे ॥ ८॥ हस्तलसच्चतुरायुधजाले शस्ततरं मृगनाभिसमेतम् । सद्धनसारसुकुङ्कुममिश्रं चन्दनपङ्कमिदं च गृहाण ॥ ९॥ लब्धविकासकदम्वकजातीचम्पकपङ्कजकेतकयुक्तैः । पुष्पचयैर्मनसावचितैस्त्वामम्ब पुरेशि भवानि भजामि ॥ १०॥ ह्रीम्पदशोभिमहामनुरूपे धूरसिमन्त्रवरेण मनोज्ञम् । अष्टसुगन्धरजःकृतमाद्ये धूपमिमं त्रिपुरेशि ददामि ॥ ११॥ सन्तमसापहमुज्ज्व्लपात्रे गव्यघृतैः परिवर्धितदेहम् । चम्पककुड्मलवृन्दसमानं दीपगणं त्रिपुरेऽद्य गृहाण ॥ १२॥ कल्पितमद्य धियाऽमृतकल्पं दुग्धसितायुतमन्नविशेषम् । माषविनिर्मिलपूपसहस्रं स्वीकुरु देवि निवेदनमाद्ये ॥ १३॥ लङ्घितकेतकवर्णविशेषैः शोधितकोमलनागदलैश्च । मौक्तिकचूर्णयुतैः क्रमुकाद्यैः पूर्णतराम्ब पुरस्तव पात्री ॥ १४॥ ह्रीं‍त्रयपूरितमन्त्रविशेषं पञ्चदशीमपि षोडशरूपम् । सञ्चितपापहरं च जपित्वा मन्त्रसुमाञ्जलिमम्ब ददामि ॥ १५॥ श्रीपदपूर्णमहामनुरूपे श्रीशिवकाममहेश्वरजाये । श्रीगुहवन्दितपादपयोजे श्रीललितापरमेशि नमस्ते ॥ १६॥ इति श्रीत्रिपुरसुन्दरीषोडशोपचारपूजा सम्पूर्णा ॥ Proofread by Pallasena Narayanaswami ppnswami at gmail.com
% Text title            : tripurasundarIShoDashopachArapUjA
% File name             : tripurasundarIShoDashopachArapUjA.itx
% itxtitle              : tripurasundarIShoDashopachArapUjA
% engtitle              : tripurasundarIShoDashopachArapUjA
% Category              : pUjA, devii, dashamahAvidyA
% Location              : doc_devii
% Sublocation           : devii
% SubDeity              : dashamahAvidyA
% Language              : Sanskrit
% Subject               : philosophy/hinduism/religion
% Proofread by          : Pallasena Narayanaswami ppnswami at gmail.com
% Latest update         : December 27, 2016
% Send corrections to   : Sanskrit@cheerful.com
% Site access           : https://sanskritdocuments.org

This text is prepared by volunteers and is to be used for personal study and research. The file is not to be copied or reposted for promotion of any website or individuals or for commercial purpose without permission. Please help to maintain respect for volunteer spirit.


Sanskrit Documents Home Home Sitemap Sanskrit Links Blog Contributors Support GuestBook FAQ Search

BACK TO TOP