श्रीतुङ्गाष्टकम्
%६५
तुङ्गा तुङ्गतरङ्गवेगसुभगा गङ्गासमा निम्नगा
रोगान्ताऽवतु सह्यसंज्ञितनगाज्जातापि पूर्वाब्धिगा ।
रागाद्यान्तरदोषहृद्वरभगा वागादिमार्गातिगा
योगादीष्टसुसिद्धिदा हतभगा स्वङ्गा सुवेगापगा ॥ १॥
स्वसा कृष्णावेणीसरित उत वेणीवसुमणी-
प्रभापूतक्षोणीचकितवरवाणीसुसरणिः ।
अशेषाघश्रेणीहृदखिलमनोध्वान्ततरणिर्दृढा
स्वर्निश्रेणिर्जयति धरणीवस्त्ररमणी ॥ २॥
दृढं बध्वा क्षिप्ता भवजलनिधौ भद्रविधुता
भ्रमच्चित्तास्त्रस्ता उपगत सुपोता अपि गताः ।
अधोधस्तान्भ्रान्तान्परमकृपया वीक्ष्य तरणिः
स्वयं तुङ्गा गङ्गाभवदशुभभङ्गापहरणी ॥ ३॥
वर्धा सधर्मा मिलितात्र पूर्वतो भद्रा कुमुद्वत्यपि वारुणीतः ।
तन्मध्यदेशेऽखिलपापहारिणी व्यालोकि तुङ्गाऽखिलतापहारिणी ॥ ४॥
भद्रया राजते कीत्र्या या तुङ्गा सह भद्रया ।
सन्निधिं सा करोत्वेतं श्रीदत्तं लघुसन्निधिम् ॥ ५॥
गङ्गास्नानं तुङ्गापानं भीमातीरे यस्य ध्यानं
लक्ष्मीपुर्या भिक्षादानं कृष्णातीरे चानुष्ठानम् ।
सिंहाख्याद्रौ निद्रास्थानं सेवा यस्य प्रीत्या ध्यानं
सद्भक्तायाक्षय्यं दानं श्रीदत्तास्यास्यास्तु ध्यानम् ॥ ६॥
(गोमूत्रिकाबन्ध)
तुङ्गापगा महाभङ्गा पातु पापविनाशिनी ।
रागातिगा महागङ्गा जन्तुतापविनाशिनी ॥ ७॥
(हारबन्धः)
हर परमरये समस्तमदामयान्
खलबलदलनेऽघमप्यमले मम ।
हरसि रसरसे समस्तमनामलं
कुरु गुरुकरुणां समस्तमते मयि ॥ ८॥
वेगातुङ्गापगाघं हरतु रथरया देवदेवर्षिवन्द्या
वारं वारं वरं यज्जलमलमलघुप्राशने शस्तशर्म ।
श्रीदत्तो दत्तदक्षः पिबति बत बहु स्याः पयः पद्मपत्रा-
क्षीं तामेतामितार्थां भज भज भजतां तारकां रम्यरम्याम् ॥ ९॥
इति श्रीवासुदेवानन्दसरस्वतीविरचितं तुङ्गाष्टकं सम्पूर्णम् ।