Vagvani Stotram

वाग्वाणीस्तोत्रम्

सरस्वतीं नमस्यामि चेतनां हृदि संस्थिताम् । कण्ठस्थां पद्मयोनिं च ह्रीङ्कारसुप्रियां सदा ॥ १॥ मतिदां वरदां चैव सर्वकामप्रदायिनीम् । केशवस्य प्रियां देवीं वीणाहस्तां वरप्रदाम् ॥ २॥ ऐं ह्रीं मन्त्रप्रियां चैव कुमतिध्वंसकारिणीम् । स्वप्रकाशां निरालम्बामज्ञानतिमिरापहाम् ॥ ३॥ मोक्षप्रदां सुनित्यां सुवरदां शोधनप्रियाम् । आदित्यमण्डले लीनां प्रणमामि जिनप्रियाम् ॥ ४॥ ज्ञानाकारां जगद्दीपां भक्तपाशविनाशिनीम् । इति सम्यक् स्तुता देवी वागीशेन महात्मना ॥ ५॥ आत्मानं दर्शयामास शरदिन्दुसमप्रभा । सरस्वत्युवाच वरं वृणीष्व भदन्त यत्ते मनसि वर्तते ॥ ६॥ बृहस्पतिरुवाच प्रसन्ना यदि मे देवी दिव्यं ज्ञानं प्रदीयताम् । सरस्वत्युवाच स्तोत्रेणानेन ये भक्त्या मां स्तुवन्ति सदा नराः ॥ ७॥ लभन्ते परमं ज्ञानं मम तुल्यपराक्रमम् । कवित्वं मत्प्रसादेन तथा च विपुलं यशः ॥ ८॥ त्रिसन्ध्यं प्रयतो भूत्वा यः स्तोत्रं पठते नरः । तस्य कण्ठे सदा वासं करिष्यामि न संशयः ॥ ९॥ ॐ ऐं वाग्वादिनि मम जिह्वायां ॐ ह्रीं मन्त्रसरस्वति स्वाहा । इति बृहस्पतिकृतं श्रीवाग्वाणीस्तोत्रं सम्पूर्णम् ॥