Vyasaproktam Narmada Stotram

 व्यासप्रोक्तं नर्मदास्तोत्रम् 

जय भगवति देवि नमो वरदे जय पापविनाशिनी बहुफलदे ।
जय शुम्भनिशुम्भकपालधरे प्रणमामि तु देवनरार्तिहरे ॥ १०३॥

जय चन्द्रदिवाकरनेत्रधरे जय पावकभूषितवक्त्रवरे ।
जय भैरवदेहनिलीनपरे जय अन्धकरक्तविशोषकरे ॥ १०४॥

जय महिषविमर्दिनि शूलकरे जय लोकसमस्तकपापहरे ।
जय देवि पितामहरामनते जय भास्करशक्रशिरोऽवनते ॥ १०५॥

जय षण्मुखसायुध ईशनुते जय सागरगामिनि शम्भुनुते ।
जय दुःखदरिद्रविनाशकरे जय पुत्रकलत्रविवृद्धिकरे ॥ १०६॥

जय देवि समस्तशरीरधरे जय नाकविदर्शिनि दुःखहरे ।
जय व्याधिविनाशिनि मोक्षकरे जय वाञ्छितदायिनि सिद्धवरे ॥ १०७॥

एतद्व्यासकृतं स्तोत्रं यः पठेच्छिवसन्निधौ ।
गृहे वा शुद्धभावेन कामक्रोधविवर्जितः ॥ १०८॥

तस्य व्यासो भवेत्प्रीतः प्रीतश्च वृषवाहनः ।
प्रीता स्यान्नर्मदा देवी सर्वपापक्षयङ्करी ॥ १०९॥

न ते यान्ति यमालोकं यैः स्तुता भुवि नर्मदा ।
पितामहोऽपि मुह्येत देवि त्वद्गुणकीर्तनात् ॥ ११०॥

वाक्पतिर्नैव ते वक्तुं स्वरूपं वेद नर्मदे ।
कथं गुणानहं देवि त्वदीयांज्ञातुमुत्सहे ॥ १११॥

इति श्रीस्कन्दपुराणे आवन्त्यखण्डे रेवाखण्डे सप्तनवतितमा- ध्यायान्तर्गतं
         व्यासकृतं नर्मदास्तोत्रं समाप्तम् ।

स्कन्दपुराण । आवन्त्यखण्ड । रेवाखण्ड । अध्याय ९७/१०३-१११॥


skandapurANa . AvantyakhaNDa . revAkhaNDa . adhyAya 97/103-111..

Proofread by PSA Easwaran