यमुनाकुलकम्
चिरगृहीतजगत्तमसो रवे-
र्जनितया प्रसृतेव तमश्छटा ।
घनतमालसपत्नसमुच्छल-
ल्लहरिका हरिकामितगोपिका ॥ १॥
सलिलकेलिपरायणवल्लवी-
कमनकायरुचिच्छुरणादिव ।
दलितनीलमणिच्छविसोदरी
सुरवरारवराजितवेणिका ॥ २॥
असितपक्षनिशाद्रिशिखास्खल-
त्तिमिरनिर्झरसञ्चयनादिव ।
प्रकटिता स्फुटकालकुशेशय-
च्छविसमाऽविसमाप्रतिभासिनी ॥ ३॥
विकचपङ्कजकोशपरिस्रव-
न्मधुरसाश्रयणादिव सभ्रमा ।
द्युतिसवर्णतया भ्रमरभ्रमद्-
व्रजवधूजवधूतजलान्तरा ॥ ४॥
घनपयःपरिणामवशादिव-
प्रचुरनीलिममज्जिमभिर्द्रुमैः ।
उभयतीरगतैः शमितातप-
प्रसरणा शरणागतवत्सला ॥ ५॥
सगणकालियभोगिफणैरिव
प्रकटनीलसरोरुहकोरकै ः ।
परिवृतोदितवल्लवमण्डली-
रसिकता सिकताश्रितधीवरा ॥ ६॥
प्रविततायतसैकतकैतवा-
दमरनिम्नगयेव करम्बिता ।
विपुलकूलविकासिगतस्पृहा-
दिकमठा कमठावलिसङ्कुला ॥ ७॥
नियमितेन्द्रिय कर्मठमण्डला-
चरितसान्ध्यविधानविकस्वरा ।
करसरोजगृहीतघटस्फुर-
त्सुकमनीकमनीयतटान्तरा ॥ ८॥
अधिजलोच्छ्रितदारवपट्टिका-
तलनिविष्टयतीशपरिष्कृता ।
विकृतिभेदविजृम्भितसंहिता-
मधुरिमा धुरि मादकृतां गता ॥ ९॥
सरससम्मिलदुन्मदमाथुरी-
प्रचुरमज्जनजर्जरितोर्मिका ।
भगवती यमुना वृजिनापहा
विजयते जयतेजनकृत् सताम् ॥ १०॥
॥ इति श्रीदुर्गाप्रसादद्विवेदीविरचितं यमुनाकुलकं सम्पूर्णम् ॥
Encoded by Lalitha Mallikarjunan
Proofread by Lalitha Mallikarjunan, Kamini Viswanathan