गणेशाक्षरमालिकास्तोत्रगीतम्
(वेङ्कटसुब्रह्मण्यकृतं गणेशाक्षरमालिकास्तोत्रं अथवा गणेशाक्षरमालिकागीतम्)
अगजाप्रियसुत वारणपतिमुख षण्मुखसोदर भुवनपते
शुभसिद्धि विनायक सिद्धिविनायक सिद्धिविनायक पालय मां -
शुभसिद्धिविनायक पालय माम् । १
आगमशतनुत मारितदितिसुत मारारिप्रिय मन्दगते । २
इज्याध्ययनमुखाखिलसत्कृति परिशुद्धान्तः करणगते । ३
ईर्ष्यारोषकषायितमानसदुर्जन दूरपदाम्बुरुह । ४
उत्तमतरसत्फलदानोद्यत बलरिपुपूजित शूलिसुत । ५
ऊहापोह विशारद संयमिवर्गकृताभय ढुण्ढिविभो । ६
ऋद्धिसुखाभयविश्राणनजनितातुलकीर्ति चयैकनिधे । ७
रूक्षाक्षरततिभर्त्सित दुर्गतवित्तविनाशन विघ्नपते । ८
लुप्तजगद्भय दिव्यगदायुध पोषितदीनजनामित भो । ९
लूतातन्तु सरूपजगच्चयनिर्मितिदक्षदृगन्त विभो । १०
एणाङ्कार्धविभूषितमस्तक लम्बोदर गजदैत्यरिपो । ११
ऐश्वर्याष्टकनियतनिकेतन पुण्ड्रोज्ज्वल शुभदिव्यकर । १२
ओतं प्रोतमिदं हि जगत्त्वयि स्रज्यहिवत्परिपूर्णसुखे । १३
औदास्यं मयि विघ्नतमः कुलमार्तण्ड प्रभ मा रचय । १४
अङ्घ्रियुगे तव सन्ततसद्रतिमाशु विधत्स्व गणेश मम । १५
अश्वस्तनगृहदारसुहृद्भवबन्धं विगलय मे त्वरया । १६
कमनीयामितशोणिमदीधिति सन्ध्या भीकृतदिग्वलय । १७
खण्डितभण्ड सहोदरनिर्मित विघ्रशिलामलशील गुरो । १८
गन्धर्वामरकिन्नरनरगणपूजितसज्जन दिव्यनिधे । १९
घुमुधुमिताखिलविष्टपदिव्यमद स्रुतिराजितगण्डयुग । २०
ङर (२५)तत्वात्मक वेददलाम्बुजमध्यगतारुणशोभतनो । २१
चञ्चलघोणसमुद्धृत पीतोज्झित जलपूरितवारिनिधे । २२
छायासहचर कोटिसुभास्वर निखिलगुणाकर सन्मतिद । २३
जम्भारिप्रमुखामर पुष्कर दिवसकराङ्कुशकर वरद । २४
झञ्झानिलमददूरीकृतिचण कर्णानिलधूताभ्रचय । २५
ज्ञप्तिसदानन्दात्मक निज वररदभान्यक्कृतशीतकर । २६
टङ्कायुधवर मस्तकखण्डन यत्नविचित्रितभीतसुर । २७
ठान्ताब्जालयवदनालोकाविस्तरकामेश्या दयित । २८
डोलायितरवि शशधरमण्डलतालातोषित सान्ध्यनट । २९
ढक्कावादनतुष्टामरगण बृंहित शिक्षितलोकतते । ३०
णान्ततदर्थ पदार्थ महार्थद पालय मां करुणालय भो । ३१
तूलोपमविभ्रामितभूधर निश्वासानिल लोकपते । ३२
थार्णवजलतति फूत्कृति विशदितमणिवर भास्वरिताण्डचय । ३३
दरवर्णात्ममनूत्तमशीलिवितीर्ण दुरापपुमर्थतते । ३४
धर्मैकप्रिय धार्मिकतारक मोदकभक्षण नित्यरत । ३५
नानालोकनिवासि मनोरथलतिकामाधवदृक्प्रसर । ३६
परमाश्चर्यानुपममनोहरविहरण पोषितलोकतते । ३७
फालविलोचन फणिवरभूषण फलततितर्पितकामचय । ३८
बालेन्दुज्ज्वल फाललसच्छवि तिर्यक्पुण्ड्रावलिललित । ३९
भगणाभामित मणिवरभूषित भस्मोद्धूलितचारुतनो । ४०
मूषिकवाहन मुनिजनपोषण मूर्तामूर्तोपाध्यगत । ४१
यामुनवारिविहारिसमर्चित यातायातक्लेशहर । ४२
रतिपतिपूजित लावण्याकर राकेन्दुज्वलनखराले । ४३
लवणरसानन्तरजलनिधिवर सुमणिद्वीपान्तरसदन । ४४
वाराणस्यावासकुतूहल चिन्तामणिसाक्ष्याद्यभिध । ४५
शङ्करतोषित दमयन्त्यर्चित राघवपूजित रतिवरद । ४६
षड्गुणरत्नाकर लम्बोदर बीजापूरप्रिय सुमुख । ४७
सर्वकृति प्रथमार्चित गौतमपत्नीसेवित यमिकुलप । ४८
हेरम्बाश्रितपालन चामरकर्ण सुजम्बूफलभक्ष । ४९
लक्ष्मीपतिमहितातुलविक्रम रोहितताताखिलवरद । ५०
क्षेमं कुरु जगतामखिलार्थद वेङ्कटसुब्रह्मण्यनुत । ५१
इत्थमियं पण(५१)वर्णमणिस्रक् सिद्धिगणाधिप पदकमले ।
निहिता ये ह्यनया स्तोष्यन्त्याप्स्यन्त्यखिलार्थांस्त्वरया ते ।
(शुभसिद्धिविनायकेति पङ्क्तिद्वयं प्रतिपङ्क्त्यन्तं संयोज्य गीयते)
Footnote : After each line numbered 2-51,
sing the two lines given in the first verse,
starting with शुभसिद्धिविनायक
इति वेङ्कटसुब्रह्मण्यकृतं गणेशाक्षरमालिकास्तोत्रं (गीतम्) सम्पूर्णम् ।
Proofread by Narendran Madathil