श्रीगणेशमानसपूजा २
रक्ताम्भोधिस्थपोतोल्लसदरुणसरोजाधिरूढं त्रिनेत्रं
पाशं चैवाङ्कुशं वै वरदमभयदं बाहुभिर्धारयन्तम् ।
शक्त्या युक्तं गजास्यं पृथुतरजठरं नागयज्ञोपवीतं
देवं चन्द्रार्धचूडं सकलभयहरं विघ्नराजं नमामि ॥ १॥
नानारत्नविचित्रकं रमणिकं सिंहासनं कल्पितं
स्नानं जाह्नविवारिणा गणपते पिताम्बरं गृह्यताम् ।
कण्ठे मौक्तिकमालिका श्रुतियुगे द्वे धारिते कुण्डले
नानारत्नविराजितो रविविभायुक्तः किरीटः शिरे ॥ २॥
भाले चर्चितकेशरं मृगमदामोदाङ्कितं चन्दनं
नानावृक्षसमुद्गतं सुकुसुमं मन्दारदूर्वाशमीः ।
गुग्गूल्लोद्भवधूपकं विरचितं दीपं त्वदग्रे स्थितं
भक्ष्यं मोदकसंयुतं गणपते क्षीरोदनं गृह्यताम् ॥ ३॥
ताम्बूलं मनसा मया विरचितं जम्बूफलं दक्षिणां
साष्टाङ्गं प्रणतोऽस्मि ते मम कृतां पूजा गृहाण प्रभो ।
मे कामः सततं तवार्चनविधौ बुद्धिस्तवालिङ्गने
स्वेच्छा ते मुखदर्शने गणपते भक्तिस्तु पादाम्बुजे ॥ ४॥
माता गणेशश्च पिता गणेशो
भ्राता गणेशश्च सखा गणेशः ।
विद्या गणेशो द्रविणं गणेशः
स्वामी गणेशः शरणं गणेशः ॥ ५॥
इतो गणेशः परतो गणेशः
यतो यतो यामि ततो गणेशः ।
गणेशदेवादपरं न किञ्चित्
तस्मात् गणेशं शरणं प्रपद्ये ॥ ६॥
बुद्ध्या कृतं वचनजं मनसेन्द्रियैर्यद्
देहेन जागृतिसुषुप्तिजस्वप्नजं यत् ।
यद्यच्च कर्म हि मया सकलं परस्मै
गजाननाय वरदाय समर्पये तत् ॥ ७॥
देहेन वाचा मनसा कृतान् मे
सांसर्गिकान् जागृतस्वप्नजातान् ।
सौषुप्ततौर्यान् सकलापराधान्
क्षमस्व हेरम्ब दयानिधे त्वम् ॥ ८॥
दीनानाथदयानिधे सुरगणैः संसेव्यमान द्विज -
ब्रह्मेशानमहेन्द्रशेषगिरिजागन्धर्वसिद्धैः स्तुत ।
सर्वारिष्टनिवारणैकनिपुण त्रैलोक्यनाथ प्रभो
भक्ति मे सफलां कुरुष्व सकलान् क्षान्त्वापराधान् मम ॥ ९॥
Encoded and proofread by P. Jayaraman vyshupjr at gmail.com, NA