गणेशपञ्चचामरस्तोत्रम् २
सुब्रह्मण्ययोगिकृतं
गणाधिपाय ते त्वया जगद्विनिर्मितं
निजेच्छया च पाल्यतेऽधुना वशे तव स्थितम् ।
त्वमन्तरात्मकोस्स्यमुष्य तन्मयि स्थितः
पुनीहि मां जगत्पतेऽम्बिकातनूज नित्य शाङ्करे ॥ १॥
गणेश्वरः कृपानिधिर्जगत्पतिः परात्परः
प्रभुः स्वलीलयाऽभवच्छिवान्मदावलाननः ।
गिरिन्द्रजातनूभवस्तमेव सर्वकर्मसु
प्रपूजयन्ति देहिनः समाप्नुवन्ति चेप्सितम् ॥ २॥
चतुःपुमर्थदायिभिचतुष्करैर्विलम्बिना
सहोदरेण सोदरेण पद्मजाण्ड सन्ततेः ।
पदद्वयेन चापदां निवारकेण भासुरं
भजे भवात्मजं प्रभुं प्रसन्नवक्त्रमद्वयम् ॥ ३॥
बलिष्ठमूषिकाधिराजपृष्ठविष्टर-
प्रतिष्ठितं गणप्रबर्हपारमेष्ठ्यशोभितम् ।
गरिष्ठमात्मभक्तकार्य विघ्नवर्गभञ्जने
पटिष्ठमाश्रितावने भजामि विघ्ननायकम् ॥ ४॥
भजामि शूर्पकर्णमग्रजं गुहस्य शङ्करा-
त्मजं गजाननं समस्तदेव बृन्दवन्दितम् ।
महान्तरायशान्तिदं मतिप्रदं मनीषिणां
गतिं श्रुतिस्मृतिस्तुतं गणेश्वरं मदीश्वरम् ॥ ५॥
यदङ्घ्रिपल्लवस्मृतिर्निरन्तरायसिद्धिदा
यमेव बुद्धिशालिनः स्मरन्त्यहर्निशं हृदि ।
यमाश्रितस्तरत्यलङ्घ्यकालकर्मबन्धनं
तमेव चित्सुखात्मकं भजामि विघ्ननायकम् ॥ ६॥
कराम्बुजैः स्फुरद्वराभयाक्षसूत्रपुस्तकं
सृणिं सबीजपूरकाब्जपाशदन्तमोदकान् ।
वहन्किरीटकुण्डलादि दिव्यभूषणोज्ज्वलो
गजाननो गणाधिपः प्रभुर्जयत्यहर्निशम् ॥ ७॥
गिरीन्द्रजामहेशयोः परस्परानुरागजं
निजानुभूतचित्सुखं सुरैरुपास्य दैवतम् ।
गणेश्वरं गुरुं गुहस्य विघ्नवर्गघातिनं
गजाननं भजाम्यहं न दैवमन्यमाश्रये ॥ ८॥
गणेशपञ्चचामरस्तुतिं पठध्वमादरात्
मनीषितार्थदायकं मनीषिणः कलौ युगे ।
निरन्तरायसिद्धिदं चिरन्तनोक्तिसम्मतं
निरन्तरं गणेशभक्ति शुद्धचित्तवृत्तयः ॥ ९॥
इति सुब्रह्मण्ययोगिकृतं गणेशपञ्चचामरस्तोत्रं सम्पूर्णम् ।
Proofread by Narendran Madathil