गणेशस्तोत्रम् रत्नपञ्चकम् १
(रत्नपञ्चके प्रथमं रत्नम् ।)
नत्वा यन्मुनय इहैव यान्ति सर्वे
निर्विघ्नं प्रथमत एव तन्नमामि ।
ब्रह्माद्यं सकलजगद् गणेशरूपं
श्रीरामं विमलमनन्तमेकवस्तु ॥ १॥
प्रत्यक्षं त्वमसि गणेश ! सर्वरूपो
ब्रह्म त्वं सकलमिदं सनामरूपम् ।
कर्ता त्वं निखिलचराचरस्य धर्ता
हर्ता त्वं त्रिशिवविरञ्चिविष्णुरूपः ॥ २॥
श्रोतारं निजमव मां सदैव शिष्यं
वक्तारं ह्यवसि न काऽपि मेऽत्र शङ्का ।
सर्वास्त्वं सुरनरसाधकान्पितेव
दिग्भागात्सकलत एव पाहि नित्यम् ॥ ३॥
सच्चित्त्वं सुखघनवाङ्मयोऽद्वितीयो
विज्ञानं परतरवस्तु देव ! साक्षात् ।
ज्ञानं त्वं सकलमयो जगत्स्वरूपः
प्रत्यक्षं शुभतममूर्तिरेव पूर्णः ॥ ४॥
मीमांसा द्विविधा हि गौतममतं वैशेषिकं यौगिकं
साङ्ख्यं व्याकरणं निरुक्तमखिलं छन्दोऽथ शिक्षादिषट् ।
कल्पो ज्यौतिषनीतिधर्मविविधा विद्याः कलाः कीर्तनं
ह्यायुःकार्मुकवास्तुवेदविषयाः शाखा गणेशः स्वयम् ॥ ५॥
ब्रह्मा विष्णुश्च रुद्रः सुरपतिरनलो भूर्मुखाः सप्तलोकाः
सूर्यस्त्वं चन्द्रमास्त्वं यमवरुणसुरा विश्वतश्चक्षुरेकः ।
सर्वज्ञः सर्वशक्तिः सरिगमपधनिब्रह्मवीणास्वरूप-
स्त्वं नाथो ह्यात्मविद्या सकलसुरमुनिध्येयरूपो गुरुस्त्वम् ॥ ६॥
त्रिकालातीतस्त्वं त्रिगुणरहितो ह्यत्रयवपु-
स्त्रिशक्तिर्मूलं त्वं वियदनिलतेजोजलभुवः ।
महायोगी मौनी यमिह सततं ध्यायति हृदा
स आत्मा सर्वेषां सकलसुररूपस्त्वमसि वै ॥ ७॥
लम्बोदरः प्रकृतितः पुरुषात्परोऽयं
विघ्नान्तको गणपतिर्जगतोऽस्य हेतुः ।
आविर्बभूव शिवनन्दनरूवतोऽसौ
सृष्टयादिकाल इह भक्तजनावनार्थम् ॥ ८॥
ॐ गं गणेशवरदं प्रणमामि नित्यं
लम्बोदरं गजमुखं धृतपाशहस्तम् ।
भक्तानुकम्पितहृदं जगदीश्वरं तं
ध्यायन्ति चात्महृदये मुनियोगिनो यम् ॥ ९॥
विद्याकलागुणनिधिं सकलार्थदं स-
च्चित्सौख्यकन्दममृतं प्रभजामि पूर्णम् ।
निर्विघ्नकारकममुं नु कलौ प्रसन्न -
मत्यल्पकालभजनात्स्वपदप्रदं तम् ॥ १०॥
रक्तगन्धरक्तपुष्परक्तवस्त्रधारक-
मेकदन्तवक्रतुण्ड रक्तवर्णशाङ्करम् ।
सूक्ष्मनेत्रशूर्पकर्णकं हि मूषकध्वजं
श्रीगणेश ! बुद्धिदायकं मुदा नमाम्यहम् ॥ ११॥
एकदन्ताय विद्महे वक्रतुण्डाय धीमहि ॥
गणेशाय नमस्तुभ्यं तन्नो दन्तिः प्रचोदयात् ॥ १२॥
नमस्ते व्रातपतये नमो विघ्नविनाशिने ॥
नमः प्रमथपतये नमः शिवसुताय ते ॥ १३॥
नमस्ते ह्येकदन्ताय चिच्छ्रीवरदमूर्तये ॥
लम्बोदर गणेशाय शूर्पकर्णाय ते नमः ॥ १४॥
शान्तो दान्तस्तितिक्षुर्गुरुपदकमले पूर्णनिष्ठः सुशिष्यः
पूर्णात्मानं गणेशं सकलभयहरं पूर्णभक्त्या विजानन् ।
ध्यात्वा स्तुत्वाऽथ नत्वा निरतिशयसुखं तत्प्रसादाल्लभेत्सः
प्रारब्धं नैव तस्य क्षणिकमपि तदा पूर्णकल्याणमूर्तेः ॥ १५॥
कल्याण सेवककृतं सुगणेशभक्त्या
स्तोत्रं चिदक्षरसतो गणनायकस्य ।
पाठात्तथा सुमननाद्गणराट्सुभक्त्या
कल्याणमत्र सलभेच्चिरशान्तिसौख्यम् ॥ १६॥
इति श्रीसमर्थरामदास-कल्याणपदान्वित-
कल्याणसेवकप्रणीत रत्नपञ्चके प्रथमं रत्नं गणेशस्तोत्रं सम्पूर्णम् ।
Proofread by Brahatha Mohan