श्रीगजाननारात्रिका
(गेयम्)
जय देव जय देव जयगजमुखदेव ।
सच्चित्सुखघनरूप सर्वानन्दकर ॥ ध्रुवपदम् ॥
ओङ्कारैकस्वरूप परब्रह्माकार
सर्वाभयवररूप नित्यं मोक्षकर ।
सर्वामरनुतमार्चनसंस्कृतपदयुगल
सर्वाग्रणिविधिहरिहरसर्वामररूप ॥ १॥
तिमिराज्ञाननिवारकदिनमणिमतिशुद्ध
भवभयहरचिद्रत्नं सकलाभीष्टकर ।
दैवीसम्पत्पूरितनिजसुखकरचन्द्र
आत्मज्ञानविरक्तिश्रेयस्सिद्धिकर ॥ २॥
ॐ गं गणपतयेनघमनुविग्रहदेव
सकलपापविनाशकमङ्गलमतिपूत ।
दोषघ्न पापघ्न शापघ्न विभव
विघ्नाम्बुधिशोषणकरमद्भुतमुखकमल ॥ ३॥
स्वानन्दामृतलोक वैदिकधर्मगुरो
श्रुतिपावितसच्चरितप्रदमतिहितवन् ।
धर्मोद्धारधुरीण धरणीभाग्यकर
अविरततत्त्वमसीति बोधनपटुदेव ॥ ४॥
सुमुखविनायकनाम्ना कृतयुगपरिपाल
गणेश इति नाम्ना तु त्रेतापरिपाल ।
गजमुखनाम्नाप्येवं द्वापरपरिपाल
कलिकामादिनिवारणब्रह्मानन्दकर ॥ ५॥
इति श्रीमत् परमहंसपरिव्राजकाचार्य सद्गुरु भगवान्
श्रीधरस्वामीमहाराजविरचिता श्रीगजाननारात्रिका सम्पूर्णा ।
श्रीक्षेत्रवरदपुरं, गणेशचतुर्थी
Proofread by Manish Gavkar