Gandharvadi Anyadevaganaih Kritam Ramanatha Stotram

 गन्धर्वादि अन्यदेवगणैः कृतं रामनाथस्तोत्रम् 

गन्धर्वा ऊचुः ।
रामनाथ त्वमस्माकं भजतां भवसागरे ।
अपारे दुःखकल्लोले न त्वत्तोन्या गतिर्हि नः ॥ ७५॥

किन्नरा ऊचुः ।
रामनाथ भवारण्ये व्याधिव्याघ्रभयानके ।
त्वामन्तरेण नास्माकं पदवीदर्शको भवेत् ॥ ७६॥

यक्षा ऊचुः ।
रामनाथेन्द्रियारातिबाधा नो दुःसहा सदा ।
तान्विजेतुं सहायस्त्वमस्माकं भव धूर्जटे ॥ ७७॥

नागा ऊचुः ।
अचिन्त्यमहिमानं त्वां रामनाथ वयं कथम् ।
स्तोतुमल्पधियः शक्ता भविष्यामोंऽबिकापते ॥ ७८॥

किम्पुरुषा ऊचुः ।
नानायोनौ च जननं मरणं चाप्यनेकशः ।
विनाशय तथाऽज्ञानं रामनाथ नमोऽस्तु ते ॥ ७९॥

विद्याधरा ऊचुः ।
अम्बिकापतये तुभ्यमसङ्गाय महात्मने ।
नमस्ते रामनाथाय प्रसीद वृषभध्वज ॥ १.४९.८०॥

वसव ऊचुः ।
रामनाथगणेशाय गणवृन्दार्चिताङ्घ्रये ।
गङ्गाधराय गुह्याय नमस्ते पाहि नः सदा ॥ ८१॥

विश्वेदेवा ऊचुः ।
ज्ञप्तिमात्रैकनिष्ठानां मुक्तिदाय सुयोगिनाम् ।
रामनाथाय साम्बाय नमोऽस्मान् रक्ष शङ्कर ॥ ८२॥

मरुत ऊचुः ।
परतत्त्वाय तत्त्वानां तत्त्वभूताय वस्तुतः ।
नमस्ते रामनाथाय स्वयम्भानाय शम्भवे ॥ ८३॥

साध्या ऊचुः ।
स्वातिरिक्तविहीनाय जगत्सत्ताप्रदायिने ।
रामेश्वराय देवाय नमोऽविद्याविभेदिने ॥ ८४॥

सर्वे देवा ऊचुः ।
सच्चिदानन्दसम्पूर्णं द्वैतवस्तुविवर्जितम् ।
ब्रह्मात्मानं स्वयम्भानमादिमध्यान्तवर्जितम् ॥ ८५॥

अविक्रियमसङ्गं च परिशुद्धं सनातनम् ।
आकाशादिप्रपञ्चानां साक्षिभूतं परामृतम् ॥ ८६॥

प्रमातीतं प्रमाणानामपि बोधप्रदायिनम् ।
आविर्भावतिरोभावसङ्कोचरहितं सदा ॥ ८७॥

स्वस्मिन्नध्यस्तरूपस्य प्रपञ्चस्यास्य साक्षिणम् ।
निर्लेपं परमानन्दं निरस्तसकलक्रियम् ॥ ८८॥

भूमानन्दं महात्मानं चिद्रूपं भोगवर्जितम् ।
रामनाथं वयं सर्वे स्वपातकविशुद्धये ॥ ८९॥

चिन्तयामः सदा चित्ते स्वात्मानन्दबुभुत्सवः ।
रक्षास्मान्करुणासिन्धो रामनाथ नमोऽस्तु ते ॥ १.४९.९०॥

रामनाथाय रुद्राय नमः संसारहारिणे ।
ब्रह्मविष्ण्वादिरूपेण विभिन्नाय स्वमायया ॥ ९१॥

इति श्रीस्कन्दपुराणे ब्रह्मखण्डे सेतुखण्डे एकोनपञ्चाशत्तमाध्यायान्तर्गतं
         अन्यदेवताकृतं रामनाथस्तोत्रं समाप्तम् ।

स्कन्दपुराण । ब्रह्मखण्ड । सेतुल्खण्ड । अध्याय ४९/७५-९१॥


skandapurANa . brahmakhaNDa . setulkhaNDa . adhyAya 49/75-91..

Proofread by PSA Easwaran