रामकृता हेरम्बस्तुतिः
॥ श्रीगणेशाय नमः ॥
राम उवाच ।
हेरम्बाय नमस्तुभ्यं दीनकर्त्रे कृपालवे ।
दीनानाथस्वरूपाणां कर्त्रे ते वै नमो नमः ॥ ७७॥
ईश्वराणां च दीनानामभेदाय च ते नमः ।
विघ्नेशाय गणानां वै पतये ते नमो नमः ॥ ७८॥
अनादये च सर्वेषामादिरूपाय ते नमः ।
अन्तमध्यप्रतिष्ठाय लम्बोदर नमो नमः ॥ ७९॥
चिन्तामणे च चित्तानां चालकाय नमो नमः ।
भेदाभेदादिहीनाय तदाकाराय ते नमः ॥ ८०॥
सर्वपूज्याय सर्वादिपूज्याय परमात्मने ।
अनन्ताय परेशाय ढुण्ढिराजाय ते नमः ॥ ८१॥
पूर्णाय पूर्णनाथाय स्वानन्दस्थाय ते नमः ।
सिद्धिबुद्धिप्रदात्रे च सिद्धिबुद्धिवराय च ॥ ८२॥
समर्थानां च ते भक्तिहीनानां दैन्यकारिणे ।
दीनानां भक्तियुक्तानां नमः सामर्थ्यकारिणे ॥ ८३॥
दीनत्वं च समर्थत्वं त्वदधीनं न संशयः ।
अतो मां रक्ष योगेश योगेशाय नमो नमः ॥ ८४॥
किं स्तौमि त्वां गणाधीश शान्तियोगस्वरूपिणम् ।
न समर्थाश्च वेदा यं योगीन्द्रास्तत्र कोऽप्यहम् ॥ ८५॥
रामस्य तस्य स्तुवत एवं सम्भक्तिभावितः ।
रोमोद्गमः प्रादुरासीत् कण्ठरोधस्तथैव च ॥ ८६॥
ततो भक्तिरसे मग्नं रामं वीक्ष्य गजाननः ।
जगाद तं वरं ब्रूहि मनसीप्सितमादरात् ॥ ८७॥
(फलश्रुतिः)
हेरम्ब उवाच ।
त्वया कृतमिदं स्तोत्रं भवेन् मत्प्रीतिवर्धनम् ।
शान्तियोगप्रदं चैव भक्तिलक्षणवर्धनम् ॥ ८८॥
यद्यदिच्छति तत्तद्वै दास्यामि स्तोत्रपाठतः ।
श्रवणेन न सन्देहः प्रियो मे स भविष्यति ॥ ८९॥
इति रामकृता हेरम्बस्तुतिः सम्पूर्णा ॥
- ॥ मुद्गलपुराणं तृतीयः खण्डः । अध्यायः २६ । ३.२६। ७७-८९॥
- .. mudgalapurANaM tRRitIyaH khaNDaH . adhyAyaH 26 . 3.26. 77-89..
Proofread by Yash Khasbage, Preeti Bhandare