मासिमासिसङ्कटहरचतुर्थीपूजा
द्वादशस्वपि मासेषु पृथङ्नामभिरर्चयेत् ।
विनायकश्चैकदन्तः कृष्णपिङ्गो गजाननः ॥
लम्बोदरो भालचन्द्रो हेरम्बो विकटस्तथा ।
वक्रतुण्डश्चाखुवाहो विघ्नराजो गणाधिपः ॥
नाम्नां द्वादशभिश्चैतैः गणेशं पूजयेद्व्रती ।
(भाद्रपद)
भद्रे ! भाद्रपदे मासि सङ्कष्ट्या या चतुर्थिका ।
अनेकफलदा प्रोक्ता सर्वसिद्धिप्रदायिनी ॥
(अश्विन)
चतुर्थी चाश्विने कृष्णा सङ्कटा व्रतमुत्तमम् ।
दूर्वाहरिद्रयोर्होमात्सप्तद्वीपवतीपतिः ।
(कार्तिक)
ऊर्ज (कार्तिक)कृष्णचतुर्थ्यां तु सङ्कष्टव्रतमुत्तमम् ।
माषान्नैश्च घृतै र्होमैः सर्वसिद्धिर्भवेन्नृणाम् ॥
(मार्गशीर्ष)
मार्गशीर्षे तु या कृष्णा चतुर्थी सङ्कटा भवेत् ।
अष्टौ च होमयेद् द्रव्यं वैरी तु वशतामियात् ॥
(पौष)
पौषे मासि महादेव ! विघ्नहन्त्री चतुर्थिका ।
तस्यां लम्बोदरः पूज्यः पेयं गोमूत्रमेव हि ॥
(माघ)
हविष्यान्नघृतैर्होमो राजवश्यार्थमेव च ।
माघमासे गणाध्यक्षं फालचन्द्रं प्रपूजयेत् ॥
मोदकान्कारयेन्मातः तिलजान्दश पार्वति ।
देवाग्रे स्थापयेत्पञ्च पञ्च विप्राय कल्पयेत् ।
पूजयित्वा च तं विप्रं भक्तिभावेन देववत् ।
दक्षिणां च यथाशक्ति मोदकान्पञ्च दापयेत् ।
(फाल्गुन)
फाल्गुनस्यासिते पक्षे हेरम्बाख्यो गणेश्वरः ।
पायसैः करवीरैश्च पुष्पैर्वश्यैश्च होमयेत् ।
घृतं च शर्करा चैव भोजनं कथ्यते बुधैः ॥
(चैत्र)
चैत्रकृष्ण चतुर्थी या व्रतं सङ्कष्टनाशनम् ।
बीजपूरैर्घृतै होमैः वन्ध्या स्त्री पुत्रमाप्नुयात् ॥
(वैशाख)
वैशाखस्यासिते पक्षे चतुर्थ्यां तद्दिने व्रतम् ।
पूजनीयो वक्रतुण्डो भोजनं शतपत्रकम् ॥
(ज्येष्ठ)
मासज्येष्ठेऽसिते पक्षे गणेशस्य चतुर्थिका ।
सौभाग्यदायिनी देवी पतिदा सा प्रकीर्तिता ॥
तस्यामाखुरथः पूज्यो विधिना भक्तिचेतसा ।
भोजनं च घृतं दिव्यं ब्राह्मणान्भोजयेत्तदा ॥
(आषाढ)
पार्थ आषाढमासे तु लम्बोदर इति स्मृतः ।
पूजनीय गणाध्यक्षः पूर्वोक्तविधिना ततः ॥
(श्रावण)
अधिमास्यसिते पक्षे चतुर्थ्यां तु विधूदये ।
पूजनीयो विधानेन विघ्नहा नृपसत्तम ॥
यथा चोत्पद्यते शक्तिर्भक्तिभावेन चार्चयेत् ।
पञ्चामृतेन च स्नायात् रक्तपुष्पैः प्रपूजयेत् ।
गन्धधूपैश्च नैवेद्यैः दूर्वायुग्मैः सुवासितैः ।
मोदकान्पञ्चदशकान् घृतशर्करया युतान् ।
कृत्वा पञ्च गणेशाय पञ्च विप्राय दापयेत् ।
कुमार्यै वटकान्दत्वा स्वयं पञ्चाच्च भोजयेत् ।
राजन्कृष्ण चतुर्थ्यां च पूजनीयो गणाधिपः ।
पञ्चामृतैः षोडशभिः उपचारैश्च पूजनम् ॥
रक्तैः करवीरपुष्पैर्नैवेद्यैर्मोदकादिभिः ।
रक्तपुष्पाक्षतैर्दूर्वाग्राभिर्नामपदैः पृथक् ॥
विश्वप्रियायेत्याचमनं स्नानं च ब्रह्मचारिणे ।
वस्त्रं गणेश्वरायेति पुष्टिदायेति चन्दनम् ॥
विनायकाय पुष्पाणि धूपं चोमासुताय च ।
दीपं रुद्रप्रियायेति नैवेद्यं विघ्ननाशिने ।
ताम्बूलं फलदायेति फलं सङ्कष्टनाशिने ॥
ततः सम्प्रार्थयेद्देवं विघ्नेशं तं गणाधिपम् ।
संसारपीडाव्यथितं भयार्तं क्लेशार्दितं मां सुमुख प्रसीद ।
त्रायस्व मां दुःखदरिद्रनाशन नमो नमो विघ्नविनाशनाय ॥
पुष्पाञ्जल्यामिमं मन्त्रं चन्द्रायार्घ्यं प्रदापयेत् ।
ब्राह्मणे भोजनं दत्वा मोदकान्दक्षिणान्वितान् ।
पश्चात्स्वयं तु भुञ्जीत देवब्राह्मणशेषतः ।
बीजापूरगदेक्षुकार्मुकरुजाचक्राब्जपाशोत्पल-
व्रीह्यग्रस्वविषाण रत्नकलशप्रोद्यत्कराम्भोरुहः ।
पायाद् वल्लभया सपद्मकरयाश्लिष्टो ज्वलद्भूषया
विश्वोत्पत्तिविपत्तिसंस्थितिकरो विघ्नेश इष्टार्थदः ॥
भूमिशायी जितक्रोधो लोभदम्भविवर्जितः ।
प्रतिमासं युतः कुर्यात् व्रतं हेरम्बतुष्टये ॥
इति मासिमासिसङ्कटहरचतुर्थीपूजा सम्पूर्णा ।
Proofread by Narendran Madathil