Shankarakritam Ganesha Stotram

शङ्करकृतं गणेशस्तोत्रम्

शङ्कर उवाच । नमस्यामि महाबाहुं देवदेवं गणेश्वरम् । हस्तिवक्त्रं महाकायं व्याघ्रचर्माम्बरच्छदम् ॥ २॥ चन्द्ररश्मिप्रतीकाशं चारुदंष्ट्रोज्ज्वलाननम् । भक्तानां विघ्नशमनं सुराद्यं पार्वतीसुतम् ॥ ३॥ परश्वधधरं वीरमक्षमालाविभूषितम् । ब्रह्मण्यं वरदं सौम्यं विघ्नानां पतिमूर्जितम् ॥ ४॥ पीनास्यं लम्बजठरं हारभारार्पितोदरम् । अष्टमी च चतुर्थी च वृता येन चतुर्दशी ॥ ५॥ कुल्माषोत्क्लोपिकापूपैर्मोदकैरोदनेन च । पूजयन्ति जना लोके धूपमाल्यानुलेपनैः ॥ ६॥ स्वस्तिवाचनकैश्चैव तेषां नास्तीह दुर्लभम् । पुत्रार्थी लभते पुत्रान्धनार्थी धनमुत्तमम् ॥ ७॥ व्याधितश्च तथाऽऽरोग्यं बद्धो मुच्येत बन्धनात् । त्वां तु सम्पूजयित्वा वै वरदं कामरूपिणम् ॥ ८॥ इष्टान्कामानवाप्नोति नात्र कार्या विचारणा । यश्चाधीते स्तवमिमं तव नित्यं गणेश्वर ॥ ९॥ तस्यापि सर्वकामानां सदा दाता भविष्यसि । इति विष्णुधर्मोत्तरपुराणे प्रथमखण्डे २२५-अध्यायान्तर्गतं शङ्करकृतं गणेशस्तोत्रं सम्पूर्णम् । विष्णुधर्मोत्तरपुराण । खण्ड १। अध्याय २२५/२-९॥ viShNudharmottarapurANa . khaNDa 1. adhyAya 225/2-9.. Proofread by PSA Easwaran