शिवप्रोक्तं गणेशस्तोत्रम्
तत्तेऽहं सम्प्रवक्ष्यामि स्तोत्रं तद्विघ्नमर्दनम् ।
कपर्दिनो महादेवि सावधानावधारय ॥ ४३॥
ॐ नमो विघ्नराजाय नमस्तेऽस्तु कपर्दिने ।
नमो महोग्रदंष्ट्राय प्रभासक्षेत्रवासिने ॥ ४४॥
कपर्दिनं नमस्कृत्य यात्रानिर्विघ्नहेतवे ।
स्तोष्येऽहं विघ्नराजानं सिद्धिबुद्धिप्रियं शुभम् ॥ ४५॥
महागणपतिं शूरमजितं जयवर्द्धनम् ।
एकदन्तं च द्विदन्तं चतुर्दन्तं चतुर्भुजम् ॥ ४६॥
त्र्यक्षं च शूलहस्तं च रक्तनेत्रं वरप्रदम् ।
अजेयं शङ्कुकर्णं च प्रचण्डं दण्डनायकम् ।
आयस्कदण्डिनं चैव हुतवक्त्रं हुतप्रियम् ॥ ४७॥
अनर्चितो विघ्नकरः सर्वकार्येषु यो नृणाम् ।
तं नमामि गणाध्यक्षं भीममुग्रमुमासुतम् ॥ ४८॥
मदवन्तं विरूपाक्षमिभवक्त्रसमप्रभम् ।
ध्रुवं च निश्चलं शान्तं तं नमामि विनायकम् ॥ ४९॥
त्वया पूर्वेण वपुषा देवानां कार्यसिद्धये ।
गजरूपं समास्थाय त्रासिताः सर्वदानवाः ॥ १.३८.५०॥
ऋषीणां देवतानां च नायकत्वं प्रकाशितम् ॥ ५१॥
इति स्तुतः सुरैरग्रे पूज्यसे त्वं भवात्मज ।
त्वामाराध्य गणाध्यक्षमिभवक्त्रसमप्रभम् ॥ ५२॥
ध्रुवं च निश्चलं शान्तं परीतं विजयश्रिया ।
कार्यार्थं रक्तकुसुमै रक्तचन्दनवारिभिः ॥ ५३॥
रक्ताम्बरधरो भूत्वा चतुर्थ्यामर्चयेत्तु यः ।
एककालं द्विकालं वा नियतो नियताशनः ॥ ५४॥
राजानं राजपुत्रं वा राजमन्त्रिणमेव च ।
राज्यं वा सर्वविघ्नेशो वशीकुर्यात्सराष्ट्रकम् ॥ ५५॥
यत्फलं सर्वतीर्थेषु सर्वयज्ञेषु यत्फलम् ।
स तत्फलमवाप्नोति स्मृत्वा देवं विनायकम् ॥ ५६॥
विषमं न भवेत्तस्य न स गच्छेत्पराभवम् ।
न च विघ्नं भवेत्तस्य जनो जातिस्मरो भवेत् ॥ ५७॥
य इदं पठति स्तोत्रं षड्भिर्मासैर्वरं लभेत् ।
संवत्सरेण सिद्धिं च लभते नात्र संशयः ॥ ५८॥
प्रसादाद्दर्शनं याति तस्य सोमेश्वरः प्रभुः ।
कपर्दाकारमुदरं यतोऽस्य समुदाहृतम् ।
ततोऽस्य नाम जानीहि कपर्द्दीति महात्मनः ॥ ५९॥
इति श्रीस्कन्दपुराणे प्रभासखण्डे प्रभासक्षेत्रमाहात्म्ये अष्टत्रिंशाध्यायान्तर्गतं
शिवप्रोक्तं गणेशस्तोत्रं समाप्तम् ।
स्कन्दपुराण । प्रभासखण्ड । अध्याय ३८/४४-५१॥
skandapurANa . prabhAsakhaNDa . adhyAya 38/44-51..
Proofread by PSA Easwaran