विश्वामित्रकृता वक्रतुण्डस्तुतिः
॥ श्रीगणेशाय नमः ॥
विश्वामित्र उवाच ।
नमस्ते गणनाथाय विघ्नेशाय नमो नमः ।
निर्गुणाय गुणानां च पते वै ते नमो नमः ॥ १५॥
नमः सर्वविदां श्रेष्ठ नमः सर्वप्रियङ्कर ।
गजाकाराय देवाय गणेशाय नमो नमः ॥ १६॥
गजवक्त्र नमस्तुभ्यं ब्रह्मणां च पते नमः ।
अनादये च सततमादिपूज्याय ते नमः ॥ १७॥
सर्वसिद्धिप्रदात्रे ते नानामायाधराय च ।
मायिभ्यो मोहदात्रे वै तद्धीनाय नमो नमः ॥ १८॥
बुद्धेः पते नमस्तुभ्यं बुद्धिपञ्चकधारिणे ।
मनोवाणीमयायैव तद्धीनाय नमो नमः ॥ १९॥
सिंहारूढाय देवाय देवानां च पते नमः ।
देवदेवेशसेव्यायानादिसिद्धाय ते नमः ॥ २०॥
नमश्चतुर्भुजायैव मूषकध्वजधारिणे ।
नमो मूषकवाहाय हेरम्बाय नमो नमः ॥ २१॥
लम्बोदर नमस्तुभ्यं शूर्पकर्णाय ते नमः ।
योगिनां कुलदेवाय योगिनां च पते नमः ॥ २२॥
एवं तस्मिन् संस्तुवति प्रादुर्भूतो गजाननः ।
अनन्तादित्यसङ्काशः सिंहारूढो महोदरः ॥ २३॥
(फलश्रुतिः)
वक्रतुण्ड उवाच ।
तं दृष्ट्वा निपपातोर्व्यां साश्रुनेत्रो महामुनिः ।
पुलकाङ्कितसर्वाङ्गो भक्तिभावेन सम्प्लुतः ॥ २४॥
तं दृष्ट्वा गणराजस्तु जगाद मुनिसत्तमम् ।
त्वया कृतमिदं स्तोत्रं मम प्रीतिकरं भवेत् ॥ २५॥
यः पठेच्छ्रुणुयाद्योऽपि स मे मान्यो भविष्यति ।
भुक्तिं मुक्तिं च दास्यामीप्सितं तस्मै न संशयः ॥ २६॥
इति विश्वामित्रकृता वक्रतुण्डस्तुतिः सम्पूर्णा ॥
- ॥ मुद्गलपुराणं प्रथमः खण्डः । अध्यायः ५४ । १.५४ १५-२६॥
- .. mudgalapurANaM prathamaH khaNDaH . adhyAyaH 54 . 1.54 15-26..
Proofread by Yash Khasbage, Preeti Bhandare