Vedavyasaproktam Dvadashanamaganapati Stotram

वेदव्यासप्रोक्तं द्वादशनामगणपतिस्तोत्रम्

व्यास उवाच । गणाधिप नमस्तुभ्यं सर्वविघ्नप्रशान्तिद । उमाऽऽनन्दप्रद प्राज्ञ त्राहि मां भवसागरात् ॥ २५॥ हरानन्दकर ध्यानज्ञानविज्ञानद प्रभो । विघ्नराज नमस्तुभ्यं प्रसन्नो भव सर्वदा ॥ २६॥ कृतोपवासो गणपं पूजयेद्यो नरो मुदा । सर्वपापविनिर्मुक्तः सुरलोके महीयते ॥ २७॥ स्तोत्रं तस्य प्रवक्ष्यामि नामद्वादशकं शुभम् । (अस्य श्रीमहागणपतिद्वादशनामस्तोत्रमहामन्त्रस्य व्यास ऋषिः । अनुष्तुप् छन्दः । भगवान् गणपतिर्देवता । श्रीमहागणपतिप्रीत्यर्थे नामपारायणे विनियोगः ।) ॐ नमो गणपतये मन्त्र एष उदाहृतः ॥ २८॥ गणपतिर्विघ्नराजो लम्बतुण्डो गजाननः । द्वैमातुरश्च हेरम्ब एकदन्तो गणाधिपः ॥ २९॥ विनायकश्चारुकर्णः पशुपालो भवात्मजः । द्वादशैतानि नामानि प्रातरुत्थाय यः पठेत् ॥ ३०॥ विश्वं तस्य भवेद्वश्यं न च विघ्नं भवेत्क्वचित् महाप्रेताश्शमं यान्ति पीड्यते व्याधिभिर्न च सर्वपापाद्विनिर्मुक्तो ह्यक्षयं स्वर्गमश्नुते ॥ ३१॥ इति श्रीपाद्मपुराणे सृष्टिखण्डे त्रिषष्टितमाध्यायान्तर्गतं द्वादशनामगणपतिस्तोत्रं समाप्तम् । महागणपतिद्वादशनामस्तोत्रम् पद्मपुराण । सृष्टिखण्ड । अध्याय ६३/२५-३१॥ padmapurANa . sRRiShTikhaNDa . adhyAya 63/25-31.. Proofread by PSA Easwaran