Vedavyasaproktam Ganapati Stotram

 वेदव्यासप्रोक्तं गणपतिस्तोत्रम् 

व्यास उवाच ।
पुनरन्यत्प्रवक्ष्यामि स्तोत्रं गणाधिपस्य च ।
सर्वसिद्धिकरं पूतं सर्वाभीष्टफलप्रदम् ॥ १॥

एकदन्तं महाकायं तप्तकाञ्चनसन्निभम् ।
लम्बोदरं विशालाक्षं वन्देऽहं गणनायकम् ॥ २॥

मुञ्जकृष्णाजिनधरं नागयज्ञोपवीतकम् ।
बालेन्दुकलिकामौलिं वन्देऽहं गणनायकम् ॥ ३॥

सर्वविघ्नहरं देवं सर्वविघ्नविवर्जितं
मूषकोत्तममारुह्य देवासुरमहाहवे ।
योद्धुकामं महाबाहुं वन्देऽहं गणनायकम् ॥ ४॥

अम्बिकाहृदयानन्दं मातृकापरिवेष्टितम् ।
भक्तप्रियं मदोन्मत्तं वन्देऽहं गणनायकम् ॥ ५॥

चित्ररत्नविचित्राङ्गं चित्रमालाविभूषणम् ।
कामरूपधरं देवं वन्देऽहं गणनायकम् ॥ ६॥

गजवक्त्रं सुरश्रेष्ठं चारुकर्णविभूषितम् ।
पाशाङ्कुशधरं देवं वन्देऽहं गणनायकम् ॥ ७॥

यक्षकिन्नरगन्धर्वैः सिद्धविद्याधरैस्सदा ।
स्तूयमानं महादेहं वन्देऽहं गणनायकम् ॥ ८॥

गणाष्टकमिदं पुण्यं भक्तितो यः पठेन्नरः ।
सर्वसिद्धिमवाप्नोति रुद्रलोके महीयते ॥ ९॥

न निःस्वतां तथाभ्येति सप्तजन्मसु मानवः ।
य इदं पठते नित्यं महाराजो भवेन्नरः ॥ १०॥

वश्यं करोति त्रैलोक्यं पठनाच्छ्रवणादपि ।
स्तोत्रं परं महापुण्यं गणपस्य महात्मनः ॥ ११॥

इति श्रीपाद्मपुराणे सृष्टिखण्डे चतुष्षष्टितमाध्यायान्तर्गतं
        वेदव्यासकृतं गणपतिस्तोत्रं समाप्तम् ।

पद्मपुराण । सृष्टिखण्ड । अध्याय ६४/१-११॥


padmapurANa . sRRiShTikhaNDa . adhyAya 64/1-11..

Proofread by PSA Easwaran