सक्षेत्रादेवाकृता श्रीविघ्नराजस्तुतिः
॥ श्रीगणेशाय नमः ॥
सक्षेत्रा देवा ऊचुः ।
ब्रह्मणे विघ्नराजाय स्वानन्दस्थाय ते नमः ।
आदिमध्यान्तहीनायादिमध्यान्तस्वरूपिणे ॥ १६॥
गणेशाय नमस्तुभ्यं भुक्तिमुक्तिप्रदायिने ।
नानाखेलकरायैव ज्येष्ठराजाय ते नमः ॥ १७॥
सृष्टिकर्त्रे च संहर्त्रे पात्रे मोहप्रचारिणे ।
गुणेशाय गुणानां तु चालकाय नमो नमः ॥ १८॥
परेशाय परेशेभ्यो मोहदाय गजानन ।
सर्वयोगमयायैव योगेशाय नमो नमः ॥ १९॥
सिद्धिबुद्धिपते तुभ्यं सिद्धिबुद्धिमयाय च ।
सिद्धिबुद्धिप्रदात्रे ते नमश्चिन्तामणे नमः ॥ २०॥
पूर्वाङ्गे विष्णुरूपाय दक्षिणाङ्गे शिवात्मने ।
पश्चिमाङ्गे च मायायै रवये उत्तराङ्गके ॥ २१॥
चतुर्विधं गणेशान सृष्ट्वा खेलसि नित्यदा ।
नानाविधं तथा त्वां तु कश्च स्तोतुं क्षमो भवेत् ॥ २२॥
वयं धन्या वयं धन्या दृष्टवन्तो गजाननम् ।
ब्रह्मणस्पतिनामानं ब्रह्मणां चालकं परम् ॥ २३॥
यं स्तोतुं न समर्थाश्च वेदाः साङ्गा गजानन ।
किं प्रस्तुमश्च देवेश अतस्त्वां प्रणमामहे ॥ २४॥
एवं स्तुत्वा गणेशानं देवाः क्षेत्रसमन्विताः ।
प्रणेमुस्तं प्रहर्षेण भक्तिभावसमन्विताः ॥ २५॥
ततस्तान् प्रत्युवाचेदं वचनं गणनायकः ।
भक्तान् भक्तिप्रियः साक्षात्तपसा तोषितः परः ॥ २६॥
(फलश्रुतिः)
श्रीगणेश उवाच ।
वरं ब्रूत महाभागाः सक्षेत्रा देवमुख्यकाः ।
दास्यामि तपसा तुष्टो भक्त्या स्तोत्रेण चेप्सितम् ॥ २७॥
स्तोत्रं भवत्कृतं चैव यः पठिष्यति मामकम् ।
स मत्प्रियो भवेद्देवाः शृणुयाच्छ्रावयेत्तथा ॥ २८॥
भुक्तिमुक्तिप्रदं चैव धनधान्यविवर्धनम् ।
पुत्रपौत्रप्रदं पूर्णं भविष्यति सुसिद्धिदम् ॥ २९॥
मम सन्निधिगो भूत्वा पठति स्तोत्रमुत्तमम् ।
सर्वक्षेत्रभवं पुण्यं लभते नात्र संशयः ॥ ३०॥
इति सक्षेत्रादेवाकृता श्रीविघ्नराजस्तुतिः सम्पूर्णा ॥
एकादशस्तोत्रं
- ॥ मुद्गलपुराणं षष्टः खण्डः । अध्यायः ८ । ६.८ १६-३०॥
- .. mudgalapurANaM ShaShTaH khaNDaH . adhyAyaH 8 . 6.8 16-30..
Proofread by Yash Khasbage, Preeti Bhandare