विश्वक्सेनकृता श्रीविघ्नेशस्तुतिः
॥ श्रीगणेशाय नमः ॥
विष्वक्सेन उवाच ।
विघ्नेशाय नमस्तुभ्यं भक्तविघ्नविनाशिने ।
विघ्नदात्रे सुनाथाय ह्यभक्तेभ्यो नमो नमः ॥ ३४॥
लक्ष्मीपते नमस्तुभ्यं सिद्धिबुद्धिवराय च ।
स्वानन्दवासिने देव विकुण्ठस्थाय ते नमः ॥ ३५॥
केशवाय परेशाय चक्रपाणे गदाधर ।
हेरम्बाय नमस्तुभ्यं परशोर्धारकाय च ॥ ३६॥
दशरथसुतायैव वासुदेवाय ते नमः ।
शिवपुत्राय देवेश वरेण्यसूनवे नमः ॥ ३७॥
योगाकाराय नाथाय योगानां शान्तिदायिने ।
कर्त्रे हर्त्रे सदा पात्रे गणेशाय नमो नमः ॥ ३८॥
शेषशायिन्नमस्तुभ्यं नाभिशेषाय ते नमः ।
सर्पयज्ञोपवीताय लम्बोदराय शाश्वते ॥ ३९॥
नानाखेलकरायैव नानामायाप्रचालक ।
खेलहीनाय देवानां सहायाय नमो नमः ॥ ४०॥
असुराणां विनाशायासुरभ्यो वरदायिने ।
ढुण्ढिराजाय भक्तेश भक्तिप्रियाय ते नमः ॥ ४१॥
गणेशाय गणानां तु चालकाय परात्पर ।
नारायणाय कृष्णाय मेघश्यामाय ते नमः ॥ ४२॥
मायायुक्ततया नाथ विष्णुरूपोऽसि सर्वदा ।
स्वमहिम्नि स्थितस्त्वं तु गणेशस्ते नमो नमः ॥ ४३॥
अतो गणेश ते नाम विष्णुर्वेदेषु कथ्यते ।
यो विष्णुः स हि विघ्नशो नान्तरं विद्यते कदा ॥ ४४॥
एवं स्तुत्वा गणेशानं प्रणनाम महामतिः ।
जगाद विष्वक्सेनं च तं देवो विघ्ननायकः ॥ ४५॥
(फलश्रुतिः)
श्रीविघ्नेश उवाच ।
वरान् वरय मत्तस्त्वं विष्वक्सेन महामते ।
तव दास्यामि भक्त्याऽहं तुष्टः स्तोत्रेण मानद ॥ ४६॥
त्वया कृतमिदं स्तोत्रं भुक्तिमुक्तिप्रदं भवेत् ।
पठते शृण्वते चैव सर्वसिद्धिप्रदायकम् ॥ ४७॥
इति विश्वक्सेनकृता श्रीविघ्नेशस्तुतिः सम्पूर्णा ॥
द्वादशस्तोत्रं
- ॥ मुद्गलपुराणं सप्तमः खण्डः । अध्यायः ११ । ७.११ ३४-४७॥
- .. mudgalapurANaM saptamaH khaNDaH . adhyAyaH 11 . 7.11 34-47..
Proofread by Yash Khasbage, Preeti Bhandare