विघ्नेश्वरपूजाविधानम्
आदौ विघ्नेश्वरपूजा
(चिकीर्षितस्य कर्मणः निर्विघ्नेन परिसमाप्त्यर्थं
हरिद्राबिम्बे क्रियमाणा पूजा)
ॐ वक्रतुण्ड महाकाय सूर्यकोटिसमप्रभ ।
अविघ्नं कुरु मे देव सर्वकार्येषु सर्वदा ॥
श्रीगुरुभ्यो नमः ।
शुक्लाम्बरधरं विष्णुं शशिवर्णं चतुर्भुजम् ।
प्रसन्नवदनं ध्यायेत्सर्वविघ्नोपशान्तये ॥
प्राणायामः ।
करिष्यमाणस्य कर्मणो निर्विघ्नेन परिसमात्यर्थं आदौ विघ्नेश्वर
पूजां करिष्ये (अप उपस्पृश्य)
गणानां त्वा गणपतिं हवामहे कविं कवीनां उपमश्रवस्तमम् ।
ज्येष्ठराजं ब्रह्मणां ब्रह्मणस्पत आ नः शृण्वन्नूतिभिः सीद सादनम् ।
अस्मिन् हरिद्राबिम्बे सुमुखं विघ्नेश्वरं ध्यायामि । आवाहयामि ।
(सर्वत्र आदी ओमिति प्रणवो योज्यः ।)
सुमुखाय विघ्नेश्वराय नमः आसनं समर्पयामि ।
सुमुखाय विघ्नेश्वराय नमः पाद्यं समर्पयामि ।
सुमुखाय विघ्नेश्वराय नमः अर्ध्यं समर्पयामि ।
सुमुखाय विघ्नेश्वराय नमः आचमनीयं समर्पयामि ।
सुमुखाय विघ्नेश्वराय नमः मधुपर्कं समर्पयामि ।
सुमुखाय विघ्नेश्वराय नमः स्रपयामि । स्नानानन्तरं आचमनीयं समर्पयामि ।
सुमुखाय विघ्नेश्वराय नमः वस्त्राणि धारयामि ।
सुमुखाय विघ्नेश्वराय नमः उपवीतं समर्पयामि ।
सुमुखाय विघ्नेश्वराय नमः आभरणानि समर्पयामि ।
सुमुखाय विघ्नेश्वराय नमः गन्धान्धारयामि । गन्धोपरि हरिद्राकुङ्कुमं समर्पयामि ।
सुमुखाय विघ्नेश्वराय नमः अक्षतान् समर्पयामि ।
सुमुखाय विघ्नेश्वराय नमः पुष्पैः पूजयामि ।
ॐ सुमुखाय नमः । ॐ एकदन्ताय नमः । ॐ कपिलाय नमः ।
ॐ गजकर्णकाय नमः । ॐ लम्बोदराय नमः । ॐ विकटाय नमः ।
ॐ विघ्नराजाय नमः । ॐ विनायकाय नमः । ॐ धूमकेतवे नमः ।
ॐ गणाध्यक्षाय नमः । ॐ फालचन्द्राय नमः । ॐ गजाननाय नमः ।
ॐ वक्रतुण्डाय नमः । ॐ शूर्पकर्णाय नमः । ॐ हेरम्बाय नमः ।
ॐ स्कन्दपूर्वजाय नमः । ॐ विघ्नेश्वराय नमः ।
सुमुखाय विघ्नेश्वराय नमः धूपमाघ्रापयामि ।
सुमुखाय विघ्नेश्वराय नमः दीपं दर्शयामि ।
सुमुखाय विघ्नेश्वराय नमः नारिकेलखण्डद्वयं कदलीफलं गुडं
सर्वं महानैवेद्यं निवेदयामि ।
निवेदनानन्तरं आचमनं समर्पयामि ।
सुमुखाय विघ्नेश्वराय नमः कर्पूरताम्बूलं समर्पयामि ।
सुमुखाय विघ्नेश्वराय नमः मन्त्रपुष्पं समर्पयामि ।
सुमुखाय विघ्नेश्वराय नमः स्वर्णपुष्पं समर्पयामि ।
सुमुखाय विघ्नेश्वराय नमः सर्वोपचारपूजाः समर्पयामि ।
वक्रतुण्ड महाकाय सूर्यकोटि समप्रभ ।
निर्विघ्नं कुरु मे देव सर्वकार्येषु सर्वदा ।
सुमुखश्चैकदन्तश्च कपिलो गजकर्णकः ।
लम्बोदरश्च विकटो विघ्नराजो विनायकः ।
धूमकेतुर्गणाध्यक्षः फालचन्द्रो गजाननः ।
वक्रतुण्डः शूर्पकर्णो हेरम्बः स्कन्दपूर्वजः ।
षोडशैतानि नामानि यः पठेच्छृणुयादपि ।
विद्यारम्भे विवाहे च प्रवेशे निर्गमे तथा ।
सङ्ग्रामे सर्वकार्येषु विघ्नस्तस्य न जायते ॥
(चिकीर्षितं कर्म आरभ्य विघ्नेश्वरं यथास्थानं प्रतिष्ठापयेत् ।)अस्मात्
हरिद्राबिम्बात् भगवन्तं सुमुखं विघ्नेश्वरं यथास्थानं
प्रतिष्ठापयामि -शोभनार्थे
क्षेमाय पुनरागमनाय च ॥
इति विघ्नेश्वरपूजाविधानं सम्पूर्णम् ।
Proofread by Narendran Madathil