Shri Raghava Ashtakam 2

श्रीराघवाष्टकम् २

कमललोचनौ काञ्चनाम्बरौ कवचभूषणौ कार्मुकान्वितौ । कलुषसंहरौ कामितप्रदौ रहसि नौमि तौ रामलक्ष्मणौ ॥ १॥ धृतशिखण्डिनौ दीनरक्षकौ धृतिहिमाचलौ दिव्यविग्रहौ । दिविजपूजितौ दीर्घदोर्युगौ रहसि नौमि तौ रामलक्ष्मणौ ॥ २॥ पवनजानुगौ पादचारिणौ पटुशिलीमुखौ पावनाङ्घ्रिकौ । परमसात्त्विकौ भक्तवत्सलौ रहसि नौमि तौ रामलक्ष्मणौ ॥ ३॥ वनविहारिणौ वल्कलाम्बरौ वनफलाशिनौ वासवस्तुतौ । वरगुणाकरौ वानरार्चितौ रहसि नौमि तौ रामलक्ष्मणौ ॥ ४॥ घनतटिन्निभौ खड्गधारिणौ घनजटाम्बरौ खण्डितव्यथौ । करशिलीमुखौ खरकरप्रभौ रहसि नौमि तौ रामलक्ष्मणौ ॥ ५॥ सवनरक्षकौ सत्यसङ्गरौ समरभीकरौ साहसान्वितौ । सदयमानसौ सर्वपूजितौ रहसि नौमि तौ रामलक्ष्मणौ ॥ ६॥ मकरकुण्डलौ मौनिसेवितौ मनुकिरीटिनौ मानुषोत्तमौ । मनुकुलेश्वरौ मञ्जुभाषिणौ रहसि नौमि तौ रामलक्ष्मणौ ॥ ७॥ वरगुणास्पदं राघवाष्टकं रहसि यः पठेद्रामभक्तिदम् । रहितकल्मषं रामसन्निधौ रविसमप्रभो राजते सदा ॥ ८॥ इति श्रीराघवाष्टकं सम्पूर्णम् । Proofread by Aruna Narayanan