रामदशकम्
हे राम जलदश्याम स्वामिन्निर्दोष पूरुष ।
भीमतामसयोनीनां मामा मुञ्च तवानुगान् ॥ १॥
उपकृत्यै सज्जनानामपकृत्यै तथाऽसताम् ।
नमतामंहसो हत्यै भूत्यै सर्वदिवौकसाम् ॥ २॥
भीत्यै खरादिदैत्यानां प्रीत्यै च वनवासिनाम् ।
स्वस्यापि महिमोन्नत्यै नीत्यै चारण्यचारिणौ ॥ ३॥
ब्रह्मरुद्रादिभिर्देवैरर्चितौ श्रुतिचर्चितौ ।
ज्ञानानन्दमयौ ध्यातृप्रियौ सर्वगुणाश्रयौ ॥ ४॥
ध्वजवज्राङ्कुशाम्भोजराजितौ राजपूजितौ ।
रक्तपद्मोपमौ ध्वस्तश्रमौ विद्रावितभ्रमौ ॥ ५॥
नारीकृतशिलौ रम्यतळौ दिव्याङ्गुलीदलौ ।
वृत्तमौक्तिकसङ्काशनखौ त्रिजगतीसुखौ ॥ ६॥
विचित्रभूषणोपेतौ भीषणौ त्यक्तदूषणौ ।
लक्ष्मीधराकराम्भोजसेवितौ सिद्धभावितौ ॥ ७॥
अनन्तवैदिकपदास्पदौ स्वजनसम्पदौ ।
अजाण्डभञ्जनौ धूताञ्जनौ भुवनरञ्जनौ ॥ ८॥
क्ष्माभारहारिणौ मुक्तिकारिणौ भववैरिणौ ।
पार्थदत्तधनौ युक्तयाऽपार्थिङ्कृतसुयोधनौ ॥ ९॥
तेवनौत्सुक्यतो भूमिपावनौ प्रणतावनौ ।
सीताभिरामौ श्रीरामचरणौ शरणं मम ॥ १०॥
इमानि दश पद्यानि श्रमापहृतये सताम् ।
यतिना वादिराजेन कृतिना रचितानि वै ॥ ११॥
इति श्रीमद्वादिराजपूज्यचरणविरचितं
श्रीरामदशकं सम्पूर्णम् ।
भारतीरमणमुख्यप्राणान्तर्गत श्रीकृष्णार्पणमस्तु ।
Proofread by Mrs Sornavalli