श्रीरामगीतम्
कौसल्यासुत-कुशिकात्मजमखरक्षणदीक्षित-राम ।
मामुद्धर-शरणागतरक्षक-रविकुलदीपक-राम ॥ १॥
दशरथनन्दन-दितिसुतखण्डन-दीनजनावन-राम ।
पुरहरकार्मुकविदलनपण्डित-पुरुषोत्तम-रघुराम ॥ २॥
खरदूषणमुखदितिसुतकाननदावानलनिभ-राम ।
शबरीगुहमुखभक्तवरार्चितपादाम्भोरुह-राम ॥ ३॥
वालिप्रमथन-वातात्मजमुखकपिवरसेवित-राम ।
वासवविधिमुखसुरवरसंस्तुत-वारिजलोचन राम ॥ ४॥
दशकन्धरमुखदानवमर्दन-रक्षितभुवन-राम ।
सीतानायक-शीघ्रवरप्रद-सर्वजगन्नुत-राम ॥ ५॥
भर्मविभूषणभूषितविग्रह-भाधीशानन-राम ।
भक्तभारतीतीर्थसुसेवित-भद्रगिरीश्वर-राम ॥ ६॥
इति भारतीतीर्थस्वामिविरचितं श्रीरामगीतं सम्पूर्णम् ।
Compised by Shri Sringeri Sharada Peethadhipati
Jagadguru Shri Shri Bharati Tirtha Mahasvamigal