श्रीरामकवचम्
कपिकटकधुरीणः कार्मुकन्यस्तबाणः
क्षपितदितिजसैन्यः क्षत्रियेष्वग्रगण्यः ।
जलधिरचितसेतुर्जानकीतोषहेतुः
पथि पथि गुणसान्द्रः पातु मां रामचन्द्रः ॥ १॥
श्रीमत्किरीटविभ्राजिशिरा रामः शिरोऽवतु ।
कुटिलालकसंशोभिललाटान्तः सुरार्थितः ॥ २॥
माणिक्यमौक्तिकोद्भासितिलकः सूर्यवंशजः ।
ललाटं पातु सुभूर्मे कौसल्यानन्दनो भ्रूवौ ॥ ३॥
धनुर्विद्यापारदृश्वा नेत्रे पात्वब्जलोचनः ।
लसन्नासापुटो नासां विश्वामित्रवृतोऽवतु ॥ ४॥
बिम्बोष्ठोऽव्यान्मदीयौष्ठौ शम्भुकार्मुकभञ्जनः ।
कुन्दकोशलसद्दन्तो दन्तान्मे जानकीपतिः ॥ ५॥
मनोज्ञरसनो जिह्वां पातु लोकमयान्तकृत् ।
वाचं व्याख्याविदग्धोऽव्याच्यक्तसाम्राज्यसम्भ्रमः ॥ ६॥
आस्यं चन्द्रोपमास्योऽव्याद्रामचन्द्रो वनेचरः ।
कम्बुग्रीवोऽवतु ग्रीवां खरदूषणसैन्यजित् ॥ ७॥
चारुदीर्घकरः पाणी मारीचमृगलुब्धकः ।
कङ्कणाङ्गदमुद्राढयोऽङ्गुलीस्त्यक्तप्रियाकृतिः ॥ ८॥
पातु पीनांसयुग्मोऽसौ हनूमन्नयनोत्सवः ।
हारकौस्तुभभृत्कण्ठमूलं सुग्रीवसख्यकृत् ॥ ९॥
उरः पातु महोरस्कः तालात्मासुरखण्डनः ।
मध्यं कृशलसन्मध्यः पातु वाल्यङ्गभेदनः ॥ १०॥
दर्भशायी विभुः पातु वलीस्त्रिवलिपल्लवः ।
तनुदरः पातु कुक्षिं कृतसेतुर्महार्णवे ॥ ११॥
निम्ननाभिः प्रभुः पातु नाभिं कपिचमूपतिः ।
पीताम्बरः स्फुरत्काञ्चीद्योतमानकटिद्वयः ॥ १२॥
ङ्काप्राकारनिर्भेदी रामः पात कटिं मम ।
ऊरू करिकरोरुर्मे चारुबाणधनुर्धरः ॥ १३॥
जृम्भिरावणसैन्याब्धिकुम्भसम्भवकोटिधूः ।
जानुनी वृत्तविलसज्जानुयुग्मो ममावतु ॥ १४॥
कम्भकर्णादिनिर्भङ्गदम्भोळासमसायकः ।
जङ्धे तुङ्गेभदन्ताभजङ्घायुग्मोऽवतु प्रभुः ॥ १५॥
दशाननशिरोरण्यपरश्वधपराक्रमः ।
मुक्ताङ्कुरसमश्रीमद्गुल्फों गुल्फौ ममावतु ॥ १६॥
ससम्भ्रमसुरश्रेणीशिरोजुष्टाङ्ध्रिपल्लवः ।
पादौ रक्षतु मे नित्यं विभीषणपदप्रदः ॥ १७॥
नखान् पातु नखश्रेणीशशिद्योतितदिङ्मुखः ।
अग्निज्वालोदितस्वीयसीतो वीतच्छिदाकृतिः ॥ १८॥
रक्तपादतलादित्यः पातु पादतले मम ।
प्राप्तायोध्यापुरैश्वर्यः प्राच्यां पातु मनोरमः ॥ १९॥
धर्मप्रवर्तकः पायादवाच्यां नीरदद्युतिः ।
पातु प्रतीच्यां यज्वीन्द्रो हनूमत्पारमेष्ठयदः ॥ २०॥
उदीच्यामुद्गतायोगविदेहतनयाप्रियः ।
अधोऽधःकृतपापैघः पातु रामोऽखिलाग्रणीः ॥ २१॥
ऊर्ध्वमुन्नीतसज्जीवनानासङ्घसुखप्रदः ।
य इदं रघुनाथस्य कवचं बिभृयान्नरः ॥ २२॥
यतिना वादिराजेन रचितं निर्मलं दृढम् ।
स्प्रष्टुं तं नैव रक्षांसि पापानि रिपवोऽपि वा ॥ २३॥
विपदो व्याधयो वाऽपि शक्नुवन्ति शरोपमाः ।
अरिं जित्वा तु संसारं यास्यत्यन्तेऽपुनर्भवम् ॥ २४॥
इति श्रीमद्वादिराजपूज्यचरणविरचितं
श्रीरामकवचं सम्पूर्णम् ।
भारतीरमणमुख्यप्राणान्तर्गत श्रीकृष्णार्पणमस्तु ।
Proofread by Gayathri Veda