रामनामाष्टोत्तरशतरामायणम्
श्रीपतिः शेषशयनो रक्ष(१)स्त्रस्तसुरस्तुतः ।
वितीर्णेष्टाभयवरः सत्यसन्धः सुराश्रयः ॥ १॥
ऋष्यशृङ्गेष्टिसम्भूतः सूर्यवंशविभूषणः ।
चतु(२)र्मूतिर्दाशरथिः कौसल्येयोऽतिसुन्दरः ॥ २॥
कैकेयीनन्दनो रामः सुमित्रानन्दवर्धनः ।
लक्ष्मणानुचरो विद्वान् वसिष्ठच्छात्रसत्तमः ॥ ३॥
कौशिकात्तधनुर्वेदः सर्वशस्त्रास्त्रविद्वरः ।
ताडका(३)स्वनिलाहीषुर्मखप्रत्यूहनाशनः ॥ ४॥
सुबाहुप्राणसंहर्ता मारीच(४)स्मयभञ्जनः ।
अहल्यांहो(५)नगपविः शतानन्दस्तवाञ्चितः ॥ ५॥
महेश्वरधनुर्भेत्ता जानकीप्राणवल्लभः ।
जामदग्न्याहङ्कृतिघ्नः पितृचित्तप्रसाधकः ॥ ६॥
गुर्वर्थत्यक्तराज्यश्रीर्दारानुजसमन्वितः ।
सुमन्त्रसूतः सत्वाढ्यो वल्कली गुहसत्कृतः ॥ ७॥
भरद्वाजाभ्यनुज्ञातश्चित्रकूटकृतस्थितिः ।
निवापविधि(६)सन्निष्ठो भरतार्पितपादुकः ॥ ८॥
लब्धात्रिसत्कृतिः श्रीमान् मुनिप्रणतिसादरः ।
विराधोद्धरणोत्साही शरभङ्ग(७)सभाजितः ॥ ९॥
सुतीक्ष्णकृतसत्कारः कुम्भसम्भवपूजितः ।
कृतपञ्चवटीवासो जटायुर्विहितादरः ॥ १०॥
छिन्नशूर्पणखाघ्राणः खरघ्नो दूषणान्तकः ।
मायास्वर्णैणमारीचरक्षःप्राणापहारकः ॥ ११॥
यतिच्छद्मदशग्रीव(८)हृतप्राणप्रियाङ्गनः ।
दयिताविरहात्यार्त(९)सर्वकामिविडम्बकः ॥ १२॥
स्वतातसखगृध्रेन्द्रसुदुरापगतिप्रदः ।
कबन्धबाहुबन्धच्छित् शबरीक्षण निर्वृतः ॥ १३॥
पम्पातीरस्मृतप्राणप्रेयसीशोकविह्वलः ।
हनूमद्दर्शनप्रीतः सुग्रीवकृतसौहृदः ॥ १४॥
प्रियोत्तरीयभूषेक्षास्पर्शानन्दनिमीलितः ।
सप्ततालभिदुद्दामवालिहृद्भेदनिष्टुरः ॥ १५॥
सुग्रीवार्पितराज्यश्रीरङ्गजाङ्गदवत्सलः ।
प्रियान्वेषणनु(१०)न्नर्क्षकुञ्जरप्लवगर्षभः ॥ १६॥
(११)स्तुततीर्णाब्धिदृष्टार्थदग्धलङ्काञ्जनाङ्गजः ।
नैकर्क्षवानरचमूशतकम्पितभूनगः ॥ १७॥
शरण्यः शरणप्राप्तबिभीषणकृतोदयः ।
सेतुकृत्तीर्णवार्राशिः सामार्थप्रहिताङ्गदः ॥ १८॥
रक्षःकक्षमहादावो मेघनादान्तकानुजः ।
कुम्भकर्णाद्रिवज्रेषुर्दशास्यगजकेसरिः ॥ १९॥
दत्तदिव्यप्रियोपेतः पुष्पकाक्रमिताम्बरः ।
गुहविश्लेषतापघ्नो भरद्वाजाप्तसद्वरः ॥ २०॥
भरतप्रियकृद्राजपौरगुर्वभिषेचितः ।
अगस्त्यादिमहर्षीड्यः सर्वप्राणिहितोद्यतः ॥ २१॥
कृतप्रजातिकल्याणो व्य(१२)सुविप्रात्मजासुदः ।
शत्रुघ्नघातितात्युग्रद्विजारिलवणासुरः ॥ २२॥
त्रिजगद्गीतसत्कीर्तिरेकदुर्मतिनिन्दितः ।
संत्यक्त(१३)सत्वसम्पन्नोदारदारसमागमः ॥ २३॥
प्राचेतसाश्रमप्राप्ततेजःकुशलवात्मजः ।
अश्वमेधोत्सवावाप्तवाल्मीकिच्छात्रनन्दनः ॥ २४॥
भूयोदिव्यमहीमग्नमहिलाविरहातुरः ।
पुत्राष्टकपृथग्दत्तराज्यः प्राज्यप्रसादकृत् ॥ २५॥
शासना(१४)तिक्रमत्यक्तप्राणात्यधिकलक्ष्मणः ।
विहितस्वयशस्तुल्यप्रभञ्जनसुतस्थितिः ॥ २६॥
आर्केन्दु(१५)भूमि स्वकथाबिभीषणकृताभयः ।
सुहृद्भरतशत्रुघ्नसुग्रीवात्मगतिप्रदः ॥ २७॥
सर्वसत्वप्रियः पौरस्थितिसन्तानलोककृत् ।
विमानारोपिताशेषराष्ट्रायोध्याजनः प्रभुः ॥ २८॥
पवित्रसेव्यचरितो निगमाद्य(१६)कविस्तुतः ।
नमन्(१७)मयूरमुदिरः पुण्यश्लोकशिखामणिः ॥ २९॥
इति श्रीरामभद्रस्य नाम्नामष्टोत्तरं शतम् ।
रामायणपयोराशेरुद्धृतं परमामृतम् ॥ ३०॥
श्रीरामः जयति ॥
इति श्रीरामनन्दनमयूरेश्वरकृतं रामनामाष्टोत्तरशतरामायणं
सम्पूर्णम् ।
Footnotes
१. रक्षोभ्यः त्रस्ताः सुराः तैः स्तुतः ।
२. चतस्रः रामलक्ष्मणभरतशत्रुघ्नरूपा मूर्तयो यस्य सः ।
३. ताडकायाः अस्वनिलः प्राणवायुः तस्य अहिरिव सर्प इव इषुर्बाणो
यस्य सः ।
४. स्मयो दर्पः।
५. अहल्याया अंहांसि दुरितानि तेषां नगः पर्वतः महान् समूह
इत्यर्थः, तस्य पविः वज्रमिव ।
६. निवापः पितृभ्यो जलाञ्जलिदानम्, तस्य विधिः तस्मिन् सती
निरतिशया निष्ठा यस्य सः ।
७. शरभङ्गेण मुनिना सभाजितः पूजितः ।
८. यतिच्छद्मना कपटयतिवेषेण रावणेन हृता प्राणेभ्योऽपि प्रिया
अङ्गना यस्य सः ।
९. दयिताया विरहेण नितरां पीडिताः ये निखिलाः कामिनस्तान् विडम्बयतीति
तादृशः ।
१०. प्रियान्वेषणार्थ नुन्नः प्रेरितः ऋक्षकुञ्जरो जाम्बवान्
प्लवगर्षभाः वानरश्रेष्ठाश्च हनूमत्प्रभृतयो येन ।
११. स्तुतः तीर्णाब्धिः दृष्टसीतारूपार्थः दग्धलङ्कश्च
अञ्जनाङ्गजो हनूमान् येन ।
१२. व्यसवे मृताय विप्रात्मजाय असून् ददातीति तादृशः ।
१३. सन्त्यक्तः परित्यक्तः सत्वसम्पन्नानां आपन्नसत्वानामुदाराणां च
दाराणां सीताया इति यावत् भार्यायाः समागमो येन सः ।
१४. शासनातिक्रमादाज्ञाभङ्गाद्धेतोः त्यक्तः प्राणेभ्योऽपि गरीयान्
लक्ष्मणः येन । दृश्यतां कथाविज्ञानाय रामायणस्योत्तरकाण्डस्य
पञ्चाधिकशततमः सर्गः ।
१५. आर्केन्दुभूमि यावत् सूर्यः चन्द्रमाः पृथिवी च तिष्ठन्ति
तावदित्यर्थः ।
१६. निगमैः ऋगादिभिः आद्यकविना च स्तुतः ।
१७. नमन्तः भक्ता एव मयूरास्तेषां मुदिर इव मेघ इव
निरतिशयानन्दजननः । अथवा कविपक्षे । नमन प्रणतो यो
मयूरकविस्तं मोदयतीति तच्छीलः ।
Proofread by Milind Khadilkar