Samudrakritam 1 Shri Rama Stotram

समुद्रकृतं १ रामस्तोत्रम् ९

समुद्र उवाच । नमामि ते राघव पादपङ्कजं सीतापते सौख्यद पादसेवनात् । नमामि ते गौतमदारमोक्षजं श्रीपादरेणुं सुरवृन्दसेव्यम् ॥ ७६॥ सुन्दप्रियादेहविदारिणे नमो नमोऽस्तु ते कौशिकयागरक्षिणे । नमो महादेवशरासभेदिने नमो नमो राक्षससङ्घनाशिने ॥ ७६॥ राम राम नमस्यामि भक्तानामिष्टदायिनम् । अवतीर्णो रघुकुले देवकार्यचिकीर्षया ॥ ७७॥ नारायणमनाद्यन्तं मोक्षदं शिवमच्युतम् । राम राम महाबाहो रक्ष मां शरणागतम् ॥ ७८॥ कोपं संहर राजेन्द्र क्षमस्व करुणालय । भूमिर्वातो वियच्चापो ज्योतींषि च रघूद्वह ॥ ७९॥ यत्स्वभावानि सृष्टानि ब्रह्मणा परमेष्ठिना । वर्तन्ते तत्स्वभावानि स्वभावो मे ह्यगाधता ॥ १.२.८०॥ विकारस्तु भवेद्गाध एतत्सत्यं वदाम्यहम् । लोभात्कामाद्भयाद्वापि रागाद्वापि रघूद्वह ॥ ८१॥ न वंशजं गुणं हातुमुत्सहेयं कथञ्चन । तत्करिष्ये च साहाय्यं सेनायास्तरणे तव ॥ ८२॥ इति श्रीस्कन्दपुराणे ब्रह्मखण्डे सेतुखण्डे द्वितीयाध्यायान्तर्गतं समुद्रकृतं श्रीरामस्तोत्रं समाप्तम् । स्कन्दपुराण । ब्राह्मखण्ड । सेतुखण्ड । अध्याय २/७५-८२॥ skandapurANa . brAhmakhaNDa . setukhaNDa . adhyAya 2/75-82.. Proofread by PSA Easwaran