ShrirAma Vijayatetarama Stotram or Shrirama Mantraraja Stotram

 श्रीरामोविजयतेतरामस्तोत्रं अथवा श्रीराममन्त्रराजस्तोत्रम् 
``श्रीराम जय राम जय जय राम'' तारकमन्त्रात्मकम् ।

श्रीरामः श्रीकरः श्रीदः श्रीसेव्यः श्रीनिकेतनः ।
राक्षसान्तकरो धीरो भक्तभाग्यविवर्धनः ॥ १॥

मरेति व्यस्तंयन्नाम जपन् व्याधोऽभवदृषिः ।
जन्मदुःखनुदं काव्यं दिव्यं व्यरचयन्महत् ॥ २॥

यदा यदा भवेद्ग्लानिर्धर्मस्य स तदा तदा ।
राक्षसान्तकरो रामो सम्भवत्यात्ममायया ॥ ३॥

महामोहकरी माया यत्प्रसादाद्विनश्यति ।
जघन्या अपि पूज्याश्च पावना बहवोऽभवन् ॥ ४॥

यस्य प्रसादतो जातो हनूमान् महतो महान् ।
जन्ममृत्युजरादुःखान्मुक्तोऽद्यापि विराजते ॥ ५॥

यस्मात्परतरन्नास्ति यस्य नाम महद्यशः ।
रामं लोकाभिरामं तं व्रजामः शरणं मुदा ॥ ६॥

मैतयिति नः सर्वान् संसारात्तारयिष्यति ।
श्री राम जयरामेति जयजयेति जपाद्ध्रुवम् ॥ ७॥

राम एव परम्ब्रह्म राम एव परागतिः ।
मनः शान्तिकरोरामो मन्मथारि नमस्कृतः ॥ ८॥

जयत्रययुतः श्रेष्ठो रामत्रययुतो मनुः ।
यत्र श्रीराममहिमा त्रिसत्यमिति वर्ण्यते ॥ ९॥

रामः श्रीसीतया युक्तः सर्वैश्वर्यव् इत्यपि ।
महत्वमस्यानन्तं यत् तच्छ्रीरामपदे स्थितम् ॥ १०॥

जय रामपदेनायं जयरूप इतीर्यते ।
यतोऽसौ जयरूपो हि जयार्हो जयदस्तथा ॥ ११॥

जयजयेति पदेऽर्थोऽयं द्योतते सर्वसिद्धिदः ।
य स्मिन्न माया नाविद्यां तस्मिन्मोहःकथं भवेत् ॥ १२॥

रामत्रये दाशरथिश्चेशो ब्रह्मेति कथ्यते ।
मरूदात्मजसन्त्राता मोचयेन्मन्दनादपि ॥ १३॥

श्री रामेति पदं पूर्वं जयरामेति वै ततः ।
रामोऽत्र द्विर्जयात्पश्चाद्वर्तते मनुराजके ॥ १४॥

महासंसारव्यामोहान्मोचयत्याश्वयं मनुः ।
जपनीयः कीर्तनीयो मुदा सर्वैश्च सर्वदा ॥ १५॥

यज्ञराक्षसभूताद्या पीडाऽनेन विनश्यति ।
रामो धनुर्धरो नित्यं संरक्षति पदे पदे ॥ १६॥

मदोन्मत्तनरैश्चापि न दुःख लभते कदा ।
जन्मसन्तापचन्द्रोऽयं ज्ञानविज्ञानदो मनुः ॥ १७॥

यत्रकुत्रापिजप्योऽयं शुचिर्वाप्यशुचिस्तथा ।
जपतःशान्तिमाप्नोति प्रशस्तोऽस्मिन्कलौमतः ॥ १८॥

यज्ञानां जपयज्ञोऽस्मि भगवद्वाक्यमीदृशम् ।
रामेणैव पुरादिष्टः षडङ्गादिविवर्जितः ॥ १९॥

मरूत्सुतावताराय रामदासाय धीमते ।
श्रीरामवरयुक्तोऽयं सुलभोऽपि फलाधिकः ॥ २०॥

त्रैलोक्यपावनी पुण्या मुक्तिदाराघवस्तुतिः ।
भद्रं तनोतु लोकेषु गङ्गेव किल सर्वदा ॥

इति श्रीमत् परमहंस परिव्राजकाचार्य सदगुरू भगवान श्री
श्रीधरस्वामीमहाराजविरचीतं श्रीरामोविजयतेतरामस्तोत्रं 
अथवा श्रीराममन्त्रराजस्तोत्रं सम्पूर्णम् ॥

रचनास्थल अयोध्या



Encoded and proofread by sonAlI upendra dasare