Rishibhih Kritam 3 Shiva Stotram

ऋषिभिः कृतं ३ शिवस्तोत्रम्

ऋषय ऊचुः । ॐ नमो मूलप्रकृतये अजिताय महात्मने । अनावृताय देवाय निःस्पृहाय नमो नमः ॥ १३॥ नम आद्याय बीजाय आर्षेयाय प्रवर्त्तिने । अनन्तराय चैकाय अव्यक्ताय नमो नमः ॥ १४॥ नानाविचित्रभुजगाङ्गदभूषणाय सर्वेश्वराय विरजाय नमो वराय । विश्वात्मने परमकारणकारणाय फुल्लारविन्दविपुलायतलोचनाय ॥ १५॥ अदृश्यमव्यक्तमनादिमव्ययं यदक्षरं ब्रह्म वदन्ति सर्वगम् । निशाम्य यं मृत्युमुखात्प्रमुच्यते तमादिदेवं शरणं प्रपद्ये ॥ १६॥ इति श्रीस्कन्दपुराणे प्रभासखण्डे प्रभासक्षेत्रमाहात्म्ये त्र्यधिकशततमाध्यायान्तर्गतं ऋषिभिः कृतं शिवस्तोत्रं समाप्तम् । स्कन्दपुराण । प्रभासखण्ड । अध्याय १०३/१३-१६॥ skandapurANa . prabhAsakhaNDa . adhyAya 103/13-16.. Proofread by PSA Easwaran