ऋग्वेदकृता शिवस्तुतिः
(शिवरहस्यान्तर्गते ईशाख्ये)
ऋग्वेदः उवाच ।
यः सोमो जनिता देवो मतीनां च दिवस्तथा ।
पृथिव्याजनिता सोमः सोमोऽग्नेर्जनिता तथा ॥ १२॥
सूर्यस्य जनिता सोम इन्द्रस्य जनिता शिवः ।
विष्णोर्वै जनिता सोमः सर्वेषां जनिता हरः ॥ १३॥
आषाढः श्रीमहादेवः पितासौ मरुतामपि ।
विश्वस्य भेषजो रुद्रः सुधन्वा सखिषु परः ॥ १४॥
नमोभिस्तं प्रपद्यामि रुद्रमध्वरनायकम् ।
भूर्णिरेव विरूपाक्षः शिवो मीढुष्टमो हरः ॥ १५॥
शम्भो त्वं प्रतिमत्वं मे मातासि च पितासि मे ।
तेन रायसहस्राढ्यं भवेन्मम सदा मुदा ॥ १६॥
तव सोमव्रतं देव तन्वा च मनसा सह ।
कान्ता ते शिवलिङ्गार्चा पश्येम शरदः शतम् ॥ १७॥
तवैव शिव नैवेद्यं तदश्याम सदा मुदा ।
भस्मरुद्राक्षसहिता जीवाम शरदः शतम् ॥ १८॥
सदा शिवकथां श्रुत्वा मोदाम शरदः शतम् ।
शिवस्य लिङ्गं दृष्टैव नन्दाम शरदः शतम् ॥ १९॥
शिवभक्ताः सदा शान्ता भवाम शरदः शतम् ।
शिवस्यैव सदा वाचा चारुनाम मनामहे ॥ २०॥
पितरं च महादेवं दृशेयं मातरं शिवम् ।
चारुचित्रं लिङ्गरूपं भजध्वं परमेश्वरम् ॥ २१॥
अकामेन भजन्तीशं धिया पावनया सुराः ।
पुरीषजिह्वास्ते सर्वे भवन्ति निरपत्रपाः ॥ २२॥
ईशादस्य भुवनस्य जन्म सदा पश्यन्ति सूरयः ।
हे देवाः प्रियमेधासः समर्चन्तु महेश्वरम् ॥ २३॥
त्रिपुरारिं महादेवं त्रिसत्यं प्रवदाम्यहम् ।
अयं गाथपतिः स्मावो जयं मेधपतिः शिवः ॥ २४॥
सर्वेशं तं महादेवं उतामृतपतिं शिवम् ।
भुवि मोक्षस्य दातारं भजेऽहं सत्पतिं शिवम् ॥ २५॥
॥ इति शिवरहस्यान्तर्गते ऋग्वेदकृता शिवस्तुतिः सम्पूर्णा ॥
- ॥ श्रीशिवरहस्यम् । ईशाख्यः द्वादशमांशः । अध्यायः ३ ऋग्वेदयजुर्वेदकृतस्तुतिः । १२-२५ ॥
- .. shrIshivarahasyam . IshAkhyaH dvAdashamAMshaH . adhyAyaH 3 RRigvedayajurvedakRRitastutiH . 12-25 ..
Notes:
Ṛgveda ऋग्वेद; at the site of DakṣaYajña दक्षयज्ञ, a eulogy in favor of Śiva शिव.
Proofread by Ruma Dewan