Ashtamurti Stava

 अष्टमूर्तिस्तवः 
यः पार्थिवं लिङ्गमुपेत्य शाल-
       ग्रामो वटोऽश्वत्थमुखो भवँश्च ।
नानाविधान् मूर्तगुणान् प्रपेदे
       तमष्टमूर्तिंशरणं प्रपद्ये ॥ १॥

योऽम्भांसि पावित्र्यगुणस्य सीमा-
       मासादयंस्तीर्थपरम्पराभिः ।
एतां त्रिलोकीं शतधा पुनीते
       तमष्टमूर्तिंशरणं प्रपद्ये ॥ २॥

य आश्रयात् त्रित्वमुपागतोऽपि
       त्रेता त्रयीमन्त्रगुणेन भूयः ।
चराचराधारतयात्मभूत-
       स्तमष्टमूर्तिं शरणं प्रपद्ये ॥ ३॥

यो योगिनां योगविभूतिसिद्धै
       समाधिसिद्धान्त-पथाधिरुढम् ।
चतुर्विधप्राणि-निकायमूल-
       स्तमष्टमूर्तिं शरणं प्रपद्ये ॥ ४॥

योऽनन्तखस्यापि गुरुर्गरीया-
       नो३मित्यहो व्यस्तसमस्तरीत्या ।
``खं ब्रह्म'' पाठेन यजुष्ट्वमाप्त-
       स्तमष्टमूर्तिं शरणं प्रपद्ये ॥ ५॥

यो देवपौरोगवतां प्रयातः
       सूर्याश्रयात् तृप्तिकरःपितृणाम् ।
आप्यायकः सर्वःमहौषधीनां
       तमष्टमूर्तिं शरणं प्रपद्ये ॥ ६॥

य उष्णताद्योतखगर्क्षकेन्द्र-
       मेकायनं मुक्तिपथोन्मुखानाम् ।
धामर्ग्यजुःसाममहोदयानां
       तमष्टमूर्तिं शिवमेकमीडे ॥ ७॥

आत्मा यःएको यत एव विष्वग्-
       ब्रह्माण्डवैचित्र्यविकाशभूमा ।
तमःप्रकाशादिविसर्गबीजं
       तमष्टमूर्तिं सहशक्तिमीडे ॥ ८॥

तर्काग्नितत्वनिलयं विलयं भ्रमाणा-
       मानन्दसिन्धुसदनं कदनं कुसृष्टेः ।
एतन्महेश्वरपदस्तवनं हि यस्मिन्
       ज्ञाते वसन्ततिलकायितविश्वमेतत् ॥ ९॥

इति श्रीदुर्गाप्रसादद्विवेदीविरचितः अष्टमूर्ति-स्तवः सम्पूर्णः ।


Encoded by Kamini Viswanathan
Proofread by Kamini Viswanathan, Lalitha Mallikarjunan