अर्बुदाचलस्तुतिः
अर्बुदाचल पर्वताधिप दिव्यमूर्ते पाहि माम् ।
अद्भुताकृतिसुन्दरागम-गीतकीर्ते पाहि माम् ॥ १॥
पार्वतीप्रियसोदरोत्तम पश्चिमाद्रे पाहि माम् ।
पद्मसम्भव-सम्भवाश्रय श्रीविभूते पाहि माम ॥ २॥
मानदण्डमुनीन्द्रतपसः सर्वसिद्धिवराकर ।
मङ्गलीकृत-शुष्कमरुभूः मौनमन्दिर पाहि माम् ॥ ३॥
वह्निरूपाचलमहेश्वर-दत्त-सम्पदलङ्कृत । (विह्निरूपाचल?)
ज्ञानकन्यकुमारिकाश्री-पादुकाञ्चित पाहि माम् ॥ ४॥
सर्वजीवाभयद-कानन-सज्जितागकलेवर ।
सकलतीर्थाश्रय महाशय संविदालय पाहि माम् ॥ ५॥
यत्र नास्ति कलिप्रवेशः क्लेशनाशकरार्बुदे ।
तत् स्वयं शाम्भवसमावेशात्मभूमा राजते ॥ ६॥
इति अर्बुदाचलस्तुतिः सम्पूर्णा ।
Proofread by Narendran Madathil