Banakritam 1 Shiva Stotram

 बाणकृतं १ शिवस्तोत्रम् 

बाण उवाच ।
देवदेव महादेव शरणागतवत्सल ।
त्वां नमामि महेशान दीनबन्धो दयानिधे ॥ २१॥

कृता मयि कृपातीव कृपासागर शङ्कर ।
गर्वोऽपहारितस्सर्वः प्रसन्नेन मम प्रभो ॥ २२॥

त्वं ब्रह्म परमात्मा हि सर्वव्याप्यखिलेश्वरः ।
ब्रह्माण्डतनुरुग्रेशो विराट् सर्वान्वितः परः ॥ २३॥

नाभिर्नभोऽग्निर्वदनमम्बु रेतो दिशः श्रुतिः ।
द्यौश्शीर्षमङ्घ्रिरुर्वी ते मनश्चन्द्रस्तव प्रभो ॥ २४॥

दृगर्को जठरं वार्द्धिर्भुजेन्द्रो धिषणा विधिः ।
प्रजापतिर्विसर्गश्च धर्मो हि हृदयं तव ॥ २५॥

रोमाण्यौषधयो नाथ केशा जलमुचस्तव ।
गुणास्त्रयस्त्रिनेत्राणि सर्वात्मा पुरुषो भवान् ॥ २६॥

ब्राह्मणं ते मुखं प्राहुर्बाहुं क्षत्रियमेव च ।
ऊरुजं वैश्यमाहुस्ते पादजं शूद्रमेव च ॥ २७॥

त्वमेव सर्वदोपास्यस्सर्वैर्जीवैर्महेश्वर ।
त्वां भजन्परमां मुक्तिं लभते पुरुषो ध्रुवम् ॥ २८॥

यस्त्वां विसृजते मर्त्य आत्मानं प्रियमीश्वरम् ।
विपर्ययेन्द्रियार्थार्थं विषमत्त्यमृतं त्यजन् ॥ २९॥

विष्णुर्ब्रह्माऽथ विबुधा मुनयश्चामलाशयाः ।
सर्वात्मना प्रपन्नास्त्वां शङ्करं प्रियमीश्वरम् ॥ ३०॥

इति शिवपुराणे रुद्रसंहितायां युद्धखण्डे
षट्पञ्चाशत्तमाध्यायान्तर्गतं बाणकृतं शिवस्तोत्रं
समाप्तम् ।

शिवपुराण । रुद्रसंहिता । युद्धखण्ड ५ । अध्याय ५६/२१-३०॥


shivapurANa . rudrasaMhitA . yuddhakhaNDa 5 . adhyAya 56/21-30..

Proofread by PSA Easwaran