बटुकभैरवरहस्यम्
श्रीदेव्युवाच -
भगवन् देवदेवश ! रहस्यं बटुकाय मे ।
ब्रूहि येन वशीकुर्यात् साधको भैरवं शिवम् ॥ १॥
श्रीबटुक उवाच -
शृणु देवि ! परं गोप्यं कथयामि सुशोभने ।
रहस्यं सिद्धिदं साक्षाद्बटुकस्य महात्मनः ॥ २॥
सर्वे बटुकदेवस्य साधने ये निरुपिताः ।
उपाया निष्फला एव विधानं वीरसाधनम् ॥ ३॥
यो वीरसाधनं हित्वा उपायं चान्यमाश्रयेत् ।
न स सिद्धिमवाप्नोति नरो वर्षशतैरपि ॥ ४॥
दक्षिणे भूचरः पातु वामे पातु सदाशिवः ।
केशान् पातु विशालाक्षो मूर्धानं मे मरुत्प्रियः ॥ ५॥
मस्तकं पातु भृग्वीशो नेत्रं पातु महामनाः ।
कपोलौ पातु वीरेशो गण्डौ गण्डारिमर्दनः ॥ ६॥
उत्तरोष्ठं विरुपाक्षो ह्यधरे योगिनीप्रियः ।
दन्ते वक्षसि विध्वंसी चिबुके पातु कालधृक् ॥ ७॥
कण्ठे रक्षतु मे देवो नीलकण्ठो जगद्गुरुः ।
दक्षस्कन्धे गिरीन्द्रेशो वामस्कन्धे च सुन्दरः ॥ ८॥
भुजे च दक्षिणे सर्वमन्त्रनाथः सदाऽवतु ।
वामे भुजे सर्वभीमो हृदयं पातु पाण्डुरः ॥ ९॥
दक्षस्तने पशुपतिर्वामे पातु महेश्वरः ।
उदरे सर्वकल्याणकारकोऽवतु मां सदा ॥ १०॥
नाभौ कामप्रतिध्वंसी जङ्घे पातु महामनाः ।
जानुनी पातु यामित्रो गुल्फो गौरीपतिः सदा ॥ ११॥
पादपृष्ठौ ज्ञाननिधिस्तथा पादाङ्गुलीर्हरः ।
पादाधः पातु सततं व्योमकेशो जगत्प्रियः ॥ १२॥
इति रक्षां समाधाय मन्त्ररक्षां ततश्चरेत् ।
अथ मन्त्ररक्षा -
ॐ ह्रां ह्रीं ह्रूं ह्रः पूर्वे भैरवाय नमः ।
ॐ ह्रिं ह्रुं ह्रौं ओग्नेय रुरु भैरवाय नमः ।
ॐ ह्रीं श्रीं दक्षिणे चण्ड भैरवाय नमः ।
ॐ ग्ल्ह्रां ग्ल्ह्रूं ग्ल्ह्रीं नग नग नैरृत्ये क्रोध भैरवाय नमः ।
ॐ प्रं श्रूं प्रूं सः सः पश्चिमे उन्मत्त भैरवाय नमः ।
ॐ ब्रां ब्रां ब्रां वायव्ये कपाल भैरवाय नमः ।
ॐ भ्रां भ्रां भ्रां उत्तरे भीषण भैरवाय नमः ।
ॐ प्रूं प्रूं स्रूं फट् ईशाने संहार भैरवाय नमः ।
॥ इति श्रीश्वरदेवीसंवादे रुद्रयामले तन्त्रे बटुकभैरवरहस्यं सम्पूर्णम् ॥
Notes:
The BaṭukaBhairvaRahasyaM बटुकभैरवरहस्यम् includes Mantra-s मन्त्राः for the DaśaDiśaḥ दशदिशः .
The source publication of RudrayāmalaTantraM रुद्रयामलतन्त्रम् mentioning this composition needs to be ascertained.
Proofread by Ruma Dewan