श्रीबटुकभैरवसहस्रनामस्तोत्रम् ४
शिव उवाच ।
एवं श्रीबटुकं ध्यायेत्रिधा भिन्नं गुणैः क्रमात् ।
शान्तिके सात्त्विकं ध्यानं वश्यादौ राजसं मतम् ॥ १॥
मारणादौ तामसं तद्देवं ध्यायेन्महेश्वरम् ।
एवं ध्यात्वा प्रसन्नात्मा स्तोत्रमेतत्पठेन्नरः ॥ २॥
अथ नामानि ।
ॐ बटुको बटुकाधीशो वटप्रीतिर्वटेशयः ।
विपाणिर्वज्रपाणिश्च वज्राभो वज्रवल्लभः ॥ ३॥
वामाचारप्रियो वक्रो वक्रग्रासो विशारदः ।
विशापो विघ्नहर्ता च वेतालाढ्यो विचक्षणः ॥ ४॥
विश्वव्यापी विश्वनाथो विश्वो बालपराक्रमः ।
विश्ववन्द्यो विश्वरूपो विश्वाधारो विकीरणः ॥ ५॥
वैद्यो बालो विराड् विष्णुर्व्योमकेशश्च वश्यकृत् ।
बलिभुग्बलिभुङ्नाथो बहुनेत्रो बरो बली ॥ ६॥
व्याधिघाती व्याधिकरो व्याध्यात्मा व्याधिवेपनः ।
कङ्कालधारी कन्दर्प कामी कान्तः कलानिधिः ॥ ७॥
कामरूपः कामचारी कल्पवित्कामिनीप्रियः ।
कोटरेशः कोटपतिः कमनीयः कपालभृत् ॥ ८॥
कङ्कालः क्रूरदृक्कालः करालः कोकिलस्वनः ।
कपर्दी कम्बुकण्ठश्च कम्बुमाली कलाधरः ॥ ९॥
कामिनीवशकृत्कौलः कुलीनः कुलरक्षकः ।
कपालमाली कुब्जश्च कण्वः कण्ठीरवः कविः ॥ १०॥
कलाकाष्ठातनुः कालशमनः कम्बुकुण्डली ।
कुरङ्गी कपिलः कीरी कुमारः कोपनः कविः ॥ ११॥
कङ्काली कपिशः केशी केशरी केशरप्रियः ।
कौपीनधारी कितवः कितवघ्नः कलाधरः ॥ १२॥
कमलावल्लभः कुठः कठोरकिरणः क्षणः ।
कौशिकः कौशिकधरः कुशभृत्कुशतल्पगः ॥ १३॥
कुशली कश्मलाकर्षी काश्मिरी कररत्नभृत् ।
कृतघ्नश्च कृतज्ञश्च कृतवीर्यः कपिध्वजः ॥ १४॥
कुशीलवः कुशीलश्च केतकी केतकीप्रियः ।
कादम्बरीयः कादम्बः कलकण्ठः कपिञ्जली ॥ १५॥
कैटभारिः कंसमर्द्दी कुरङ्गवदनः कुशः ।
भूधरो भूधराधीशो भैरवो भैरवीप्रियः ॥ १६॥
भूतात्मा भूतपो भूभृत् भृगुजो भूधरात्मजः ।
भवसूनुर्भवो भीरुर्भ्रामरो भूतसम्भवः ॥ १७॥
भीषणो भैरवीनाथो भगवान्भोगिभूषणः ।
भस्मधारी भ्रमहरो भूताध्यक्षश्च भिक्षुकः ॥ १८॥
भ्रूणहा भूतहा भूतो भीतोऽभीतोऽभयङ्करः ।
खरान्तकृत्खर्पराशिः खड्गपाणिः खलाप्रियः ॥ १९॥
खण्डभूः खण्डपरशुः खड्गी खट्वाङ्गभृत्खलः ।
खेचरः खेचरी नाथः खपुरः खगनायकः ॥ २०॥
खेलाप्रियः खातकीर्तिः खरनादः खरव्रतः ।
खेचरीकृत् खेटकभृत् खातीतः खाण्डवाशनः ॥ २१॥
गन्धर्वगीतो गङ्गेशो गोपतिर्गोपिकापतिः ।
गर्विष्ठो गर्वहा गेयो गौरो गौरीसुतो गुरुः ॥ २२॥
गीर्वाणगीतो गीर्वाणो गाढो गाढान्धकारहा ।
गेयो गरुडगो गोऽवो गुप्तो गोप्ता गराशनः ॥ २३॥
गजकृत्तिधरो गुञ्जो गुञ्जाहारधरो गजः ।
गेयप्रियो गह्वरगो गुञ्जस्थो गुञ्जगायकः ॥ २४॥
गोवर्द्धनधरो गोष्ठरक्षको गोकुलप्रियः ।
गम्भीरो गोधनो गोपो गोधाभृद्गिरिजात्मजः ॥ २५॥
जगदीशो जनाध्यक्षो जीवनो जीवनप्रियः ।
जीवानुजीवनच्छेदी जीवितात्मा जनार्दनः ॥ २६॥
जृम्भणश्च जवी जीवो जैनो जैनजयङ्कर ।
जपप्रियो जपासक्तो जापको जपकार्थकृत् ॥ २७॥
जम्बूश्यामो जितक्रोधो जितारातिर्जितासुरः ।
जम्बुको जानकीजानिर्जटिलो जनमेजयः ॥ २८॥
जीर्णो जीर्णोज्ज्वलन्नेत्रो जामदग्न्यो जयप्रदः ।
झषकेतुर्झषहरो झिण्टीशो झषभोजितः ॥ २९॥
झङ्कारकारी झम्पी च झषवान्झषवल्लभः ।
मधुरो मदिरामत्तो मेघनादो मृगाधिपः ॥ ३०॥
मधुमत्तो मद्यगन्धो मेदस्वी मेघदीधितिः ।
मोदनो मेदिनीनाथो मघवा मण्डभूषणः ॥ ३१॥
माधुकरीप्रियो मत्तो मेधावी मधुसूदनः ।
मदनो मदनप्रीतो मुकुन्दो मादनो मरुत् ॥ ३२॥
अथ नवश्लोकाः क्षेपकाः ।
मकरो माधवो मीनो मीनकेतुर्महेश्वरः ।
महेषुर्मदनो मन्थो मिथुनेशोऽमराधिपः ॥ ३३॥
मरीचिर्मञ्जुलो मोहो मोहहा मोहमर्दनः ।
मोहको मोहनो मेघप्रियो मोहविनायकः ॥ ३४॥
महीपतिर्महीशानो महीराजो मनोहरः ।
महीश्वरो महीपालो महीनाथो महीप्रियः ॥ ३५॥
महीधरो महादेवो मनुराजो मुनिप्रियः ।
मानी मौनधरो मेघो मन्दिरो मतिवर्द्धनः ॥ ३६॥
मतिदो मन्थरो मन्त्रो मन्त्रीशो मन्त्रनायकः ।
मेधावी मानदो मानी मानहा मानमर्दनः ॥ ३७॥
मीनगो मकराधीशो मधुरो मणिरञ्जितः ।
मणिरम्यो मणिभ्राता मणिमण्डनमण्डितः ॥ ३८॥
मन्त्रपो मन्त्रदो मुग्धो मोक्षदो मोक्षवल्लभः ।
मल्लो मल्लप्रियो मञ्चो मल्लको मेलनप्रभुः ॥ ३९॥
मल्लिको मल्लिकागन्धी मल्लिकाकुसुमप्रियः ।
मालतीशो मघानाथोऽमोघमूर्तिमघेश्वरः ॥ ४०॥
याचको याज्ञिको यज्ञो यज्ञेशो यज्ञवर्द्धनः ।
रमापतिर्रमाधीशो रमेशो रामवल्लभः ॥ ४१॥
इति क्षेपकाः ।
धनेशो ध्रुवधूर्धीमान्धिषणो धूम्रलोचनः ।
दाता दापयिता दुर्गो दान्तो दान्ताशयो दमः ॥ ४२॥
देवो देवाधिपो दावो दुःखहा दुःखसेवितः ।
दरिद्रो दारदो दारो देवतात्मा दमी दयी ॥ ४३॥
दण्डकृद्दण्डहा दीप्तो दीप्तकेशो दयान्वितः ।
दार्वीकरो दरी दीर्घो दीपनो दीपवल्लभः ॥ ४४॥
दिगम्बरो दीर्घदंष्ट्रो दक्षिणो दक्षिणोदरः ।
दंष्ट्री दंष्ट्रिप्रियो दैत्यो दिव्यो दिव्यपराक्रमः ॥ ४५॥
दैत्यहा दक्षिणार्हश्च दीर्घपृष्ठो दिवाकरः ।
घण्टावादी घनरवो घनाभो घूत्करो घनः ॥ ४६॥
घण्टापथी घटो घूको घध्वकरपरिवारितः ।
घणी घर्मांशुरघहा घातहा घातकारकः ॥ ४७॥
घोरो घनाघनोऽर्घीशो घस्मरो घोरघोषवान् ।
छगलण्डश्छलच्छेत्ता छत्री छातछविश्छली ॥ ४८॥
छगलाक्षो छदो छिन्नश्छुच्छुरीकश्छिदाङ्कुरः ।
छन्दश्छन्दप्रियश्छन्दश्छिदुरश्छद्महोछ्रितः ॥ ४९॥
तपनीयप्रभजटस्तरुणस्तरुणीप्रियः ।
तुन्दिलस्तपनस्तेयस्तोमरस्तोमरप्रियः ॥ ५०॥
तुष्कस्तुरुष्कस्तिलभुक् त्रिमूर्तिस्त्रिपुरान्तकः ।
त्रिशूलधारी त्रिशीर्षी त्रिपुरश्च त्रिलोकपः ॥ ५१॥
त्रिनेत्रस्त्रिपुरावासस्तेजस्वी त्रिदिवस्पतिः ।
त्रिविक्रमस्तृणावर्त्तस्तृप्तस्तृप्तिप्रियस्तमः ॥ ५२॥
तमोपहस्तिमिस्त्रेशस्त्रिदशस्त्रीश्वरस्तपः ।
त्रिनेत्रतनयस्तिग्मस्तमोमूर्तिस्तमोमयः ॥ ५३॥
तापनस्तोदनस्त्रेता तारानाथस्त्रिलोचनः ।
नित्यो निरञ्जनो नेता नीतिज्ञो नयवल्लभः ॥ ५४॥
नन्दनो निपुणो नम्रोनम्रोऽनेमिर्निमिर्नयः ।
नागहारो नागपाशो नित्यकामो नतिप्रियः ॥ ५५॥
निर्ममो नमनो नान्यो नैगमो नैगमेश्वरः ।
नित्यक्लिन्नो नित्यनवो निरुद्धो नन्ददीपकः ॥ ५६॥
निर्मलो निर्मलाकारो न्यस्तनिन्दो नदीश्वरः ।
नक्षत्रनाथो निगमो निगमारम्भको नवः ॥ ५७॥
निधीशो निरहङ्कारो नानारूपी नमेरुकः ।
नास्तिकारी नास्तिकहा निश्चितो निश्चिताशयः ॥ ५८॥
निश्चलोऽनेकवदनो नाथो नारायणो नखी ।
नरकघ्नो नरकदो नीलो नीलालकोऽनलः ॥ ५९॥
नीलाम्बरो नीलकण्ठो नीलजीमूतसन्निभः ।
पण्डितः पञ्चवदनः पञ्चमः पञ्चमप्रियः ॥ ६०॥
पञ्चयज्ञः पञ्चवातः पञ्चवित्तः पविप्रियः ।
पञ्चश्लेष्मा पञ्चबाणः पञ्चस्थानः परन्तपः ॥ ६१॥
परमायुः परः पद्मी पद्मेशः पद्मवल्लभः ।
पद्मनाभः पद्ममुखः पद्मः पद्मासनस्थितः ॥ ६२॥
पद्मजः पद्मनिलयः पद्मगन्धः परात्परः ।
पर्वतः पर्वताधारः पारदः पारदप्रियः ॥ ६३॥
परदारपरः प्रौढः पटुः पाण्डुरलोचनः ॥ ६४॥
पेटभृत्पेटकृत्पेटी पन्नगी पन्नगेश्वरः ।
पाण्डुहा पाण्डुरः पिण्डी पञ्चभूतप्रशासनः ॥ ६५॥
पतङ्गः पक्षिराजश्च परलोकप्रदः प्रभुः ।
पानदः पानपः पानी पानारुणविलोचनः ॥ ६६॥
पिशाचघ्नः पिशाचेशः पिशिताशी पितामहः ।
पिता प्रतापवान्पाशी पाशिनाथः पशुप्रियः ॥ ६७॥
पशुभोक्ता पशुपतिः पशुप्रेष्ठ पशूदरः ।
पीनसारिः पिपासार्त्तः पीडाकृत्पीडनाशनः ॥ ६८॥
प्रेतघ्नः प्रेतकुलपः प्रेतवाहः प्रकम्पनः ।
प्रेतनाथः प्रेतपूज्यः पीतवासाः प्रजागरः ॥ ६९॥
प्रजापतिः प्रजानाथः परिपूर्णः प्रियोऽप्रियः ।
पर्जन्यकृत्प्रशमनः परमः परमास्पदः ॥ ७०॥
प्रसन्नगः प्रतिच्छन्नः प्रतिभाकृत्प्रपूजितः ।
प्रमेहघ्नः प्रमेही च प्रमेहकृदथप्रभः ॥ ७१॥
प्रमः प्रमादहा प्रौढः प्रौढिदः प्रौढिवल्लभः ।
प्रेमदः प्रमदाप्रेमी प्रमदः प्रमदाप्रियः ॥ ७२॥
प्रकामदः प्रकामेशः प्राणदः प्राणवल्लभः ।
प्राणाधारः प्रयागश्च प्रयागनिलयप्रदः ॥ ७३॥
परिचारः परिवरः प्रशान्तः प्रतिभानवान् ।
प्रेयः प्रेयवियोगी च प्रमथश्च प्रियंवदः ॥ ७४॥
सारमेयानुगः सीधुः सीधुः सीधुपवल्लभः ।
सावधानः साधुपूज्यः सारमेयधरः समः ॥ ७५॥
सर्वापत्तारणः सिद्धः सिद्धिदः सिद्धिसेवितः ।
सामन्तभद्रः सन्तोषी सत्यः सत्यपराक्रमः ॥ ७६॥
सत्यसन्धः सत्यवक्ता सत्पदः सत्यवल्लभः ।
सत्यभामापतिः शूरः सम्पन्नःसम्पदालयः ॥ ७७॥
सरस्वान् सागरः सेतुः सेतुकृत्सेतुपालकः ।
समुद्रसीमासामन्तः स्मरारिः सत्यसङ्गरः ॥ ७८॥
स्मरः स्मरप्रियः स्मेरः स्मरदः स्मरसुन्दरः ।
समिद्धः सम्मदः सिन्धुः सामगः सामगार्चितः ॥ ७९॥
समयः समयाचारः शङ्करप्रियबान्धवः ।
सम्मोहदः संशयदः संशयघ्नः समुद्धतः ॥ ८०॥
सोमः सोमधरः सौम्यः सौम्यः शान्तजनप्रियः ।
सुन्दरः सुन्दराधारः सुरापः सुरसः सुरः ॥ ८१॥
सुरासक्तः सुगमोदी सुरापालः सुरात्रियः ।
स्वर्गः स्वर्गपतिः स्वर्गी स्वर्गदः स्वर्गवल्लभः ॥ ८२॥
सुखी सुखाकरः सौख्यसिन्धुः सिन्धुरनायकः ।
सारस्वतः स्वानुभवः स्वानुभावस्वानुध्रु(स्रु)वः ॥ ८३॥
स्वयम्भूकुसुमामोदी स्वयम्भूकुसुमप्रियः ।
समगः सर्वतोभद्रः सर्वसत्त्वः सरोवरः ॥ ८४॥
सारी सरीसृपाधीशः समाराध्यः समामयः ।
सन्तानदः सत्त्वदाता सरोजाक्षः सरोजभूः ॥ ८५॥
सर्वसिद्धिप्रदः सारी सरोजनयनप्रियः ।
सुपर्वनाथः सर्वज्ञः सर्वगः सर्वदीपनः ॥ ८६॥
श्मशानवासी स्तम्भी च सर्पयुक्तः सहस्रदृक् ।
सहस्रदो सहस्राङ्घ्रिः सहस्रकिरणप्रभः ॥ ८७॥
शौरिः शम्भुसुतः शम्भूः शिवः शूली शवाअस्नः ।
श्रीकण्ठः शितिकण्ठश्च श्रीपतिः श्रीनिकेतनः ॥ ८८॥
श्रेयोनिधिः शङ्करश्च शर्वः सर्वात्मजः शमः ।
शतानन्दः शशधरः शबरः शबरीसुतः ॥ ८९॥
शोभनः शोभनावासः शोकहा शोकनाशनः ।
शतानन्दः शूलपाणिः शुचिः शौचपरः शुभः ॥ ९०॥
शिखिसखः श्रुतिधरः श्रुतिगीतः श्रुतिप्रियः ।
शुद्धाशयः शुद्धिकरः शुद्धः शुद्धजनप्रियः ॥ ९१॥
शोणः शोणाधरः शोणनेत्रः शोणाङ्गरागभृत् ।
शीतः शीताशयः शौण्डः शौण्डिकः शौण्डिकप्रियः ॥ ९२॥
शाड्यहा शाड्यदः शार्ङ्गी शरी शरणदः शिशुः ।
शुद्धनीलाञ्जनप्रख्यः शान्तिदः शान्त इत्यपि ॥ ९३॥
शकः शाकम्भरीयश्च शङ्कितः शङ्किताननः ।
हरो हरिर्हयग्रीवः हयारिकुसुमप्रियः ॥ ९४॥
हेरम्बो हयमेधी च हेषणो हरवल्लभः ।
हव्यवाहो हुतवही हारी हारीतपूजितः ॥ ९५॥
हिंस्रहा हिंस्रयो हेतिर्हेलानुश्च हलायुधः ।
हिरण्यरेता हरिणो हरिणाक्षो हरिप्रियः ॥ ९६॥
हिमो हिमालयचरो हिमधामाविभूषणः ।
हेममाली हेमकान्तिर्हेमाचलकृतालयः ॥ ९७॥
हारको हारशाली च होता होमो हुतिर्हयः ।
यशप्रदो यशोवृद्धो यशस्वी यशसां निधिः ॥ ९८॥
यज्वा यजनकामश्च यजुर्यजनतत्परः ।
यमो यमभयध्वंसी यमवन्द्यो यमान्तकृत् ॥ ९९॥
यज्ञभोक्ता यज्ञकरो यवनो यवनोद्धतः ।
यवप्रियो यौवनाढ्यो युवतीवछभो यवी ॥ १००॥
यामलो यामलाधीशो यशोदानन्दवर्धनः ।
योद्धा युद्धप्रियो यूपो योक्तिको योगिनीपतिः ॥ १०१॥
योगी योगीश्वरो योक्ता योगिराड्योगिसेवितः ।
रतिप्रदो रतिकरो रतिनाथो रतिप्रदः ॥ १०२॥
रमणीयो रमानाथो रजनीशो रमेश्वरः ।
रससिद्धीश्वरो रम्यो रसज्ञो रसपूजितः ॥ १०३॥
रञ्जनो रोचनो रागो रोगो रोगकुलान्तकृत् ।
रासो रासप्रियो रन्ता रङ्गो रङ्गकृतास्पदः ॥ १०४॥
रक्तपो रक्तनयनो रक्तदो रक्तनाशनः ।
रुरू रुद्रो रौद्रमुखो राजा राजीववर्द्धनः ॥ १०५॥
रसो रतिरसाधारो रसालो रविलोचनः ।
लोकनाथो लोकचक्षुर्ललितो ललितात्मजः ॥ १०६॥
लम्बोदरो लम्बदंष्ट्रो लोलो लोलविलोचनः ।
लोहिताक्षो लोहितपो लालपो ललनाप्रियः ॥ १०७॥
लेलिहानो ललजिह्वो (ललज्जिह्वो) लक्ष्मीनाथो लुलायुगः ।
क्षेत्रपालश्च(क्षेत्रपालो च) क्षेत्रज्ञः क्षत्रियः क्षेत्रपः क्षमी ॥ १०८॥
क्षमाधारः क्षौमधरः क्षेमकारी क्षयापहः ।
क्षपापतिधरः क्षुद्रः क्षान्तः क्षान्तजनप्रियः ॥ १०९॥
क्षितिदः क्षतिदः क्षौद्रप्रियः क्षीरप्रियोऽक्षयः ।
क्षोभहा क्षोभदोऽक्षोभ्यः क्षिप्रसिद्धप्रदो क्षुपः ॥ ११०॥
क्षेमकरः क्षौद्रपिङ्गः क्षामशत्रुः क्षुधाकरः ।
क्षोभणः क्षीरदः क्षीरी क्षवकः क्षवदोषहा ॥ १११॥
आन्त्रयज्ञोपवीतीशोऽजगरोऽग्रिरहो रहः ।
इन्दुरिन्दिन्दिरो बिन्दुरिन्द्रेभः इन ईश्वरः ॥ ११२॥
डिम्भ ऊर्जस्वलः स्वस्तिः स्वाहाभुग्गुरुरर्जुकः ।
ज्ञानचक्षुश्चोर्ध्वरेता दशदिक्पालपालकः ॥ ११३॥
शाकिनेयो डाकिनेयो राकिनेयस्तथैव च ।
काकिनेयो लाकिनेयो डाकिनेयोऽपि हाकिनिः ॥ ११४॥
पञ्चाशद्वर्णतनुकः षडाधारः षडध्वकः ।
अष्टाधारोऽष्टमूर्तिश्च ब्रह्मरन्ध्रकृतालयः ॥ ११५॥
सहस्रपत्रभवनो द्विपत्रपरमास्पदः ।
षोडशारकृतावासी द्वादशच्छदमण्डनः ॥ ११६॥
दशारकृतविश्रामः षडारविहितादरः ।
चतुर्दलविकासी च चतुरस्रविनोदनः ॥ ११७॥
इडाधारः सुषुम्णेशः पिङ्गलापरिपालकः ।
संसारसाक्षी चिद्रूपः परमात्मा सदाशिवः ॥ ११८॥
पञ्चविंशतितत्त्वात्मा विकृतः प्रकृतेः परः ।
अव्यक्तश्चाव्ययो हंसो नादः सत्त्वात्मको विभुः ॥ ११९॥
एतद्वटुकनाथस्य नाम्नां साग्रं सहस्रकम् ।
यः पठेत्प्रातरुत्थाय मध्याह्ने वा निशामुखे ॥ १२०॥
मासत्रयाद्दत्यस्मै श्रीमद्भटुकभैरवः ।
मनोऽभिलषितं देवि देवानामपि दुर्लभम् ॥ १२१॥
पुरश्चरणमेतस्य नामसङ्ख्यं प्रकीर्तितम् ।
तद्दशांशं प्रजुहुयात्संस्कृते हव्यवाहने ॥ १२२॥
तन्दुलैस्तु त्रिमध्वक्तैस्तिलमिश्ररतन्द्रितः ।
तर्पणं तद्दशांशेन प्रोक्तद्रव्येण कल्पयेत् ॥ १२३॥
मार्जनं तद्दशांशेन तद्दशांशेन भोजनम् ।
दक्षिणा तु यथाशक्ति कल्पनीया मनीषिभिः ॥ १२४॥
एवं कृते भवेत्सिद्धिः स्तोत्ररूपो मनुस्त्वयम् ।
छागचर्मासनासीनोऽरिष्टबीजाक्षमालया ॥ १२५॥
त्रिसुगन्धिसुगन्धास्यो मुदितात्मा तु साधकः ।
पर्वताग्रे तथारण्ये पुण्ये चोपवनेऽथवा ॥ १२६॥
सिन्धुसम्भेदके वापि गोष्ठे वा बिल्वमूलके ।
शिवालये गृहे शून्ये दरदारुणितान्तरे ॥ १२७॥
यथोक्तविधिनाभ्यर्च्य देवं पश्चाजपेन्मनुम् ।
स्तोत्ररूपमिदं प्रातरारभ्यार्द्धदिनावधि ॥ १२८॥
ततो हविष्यभोजी स्यात्पौरश्चरणिको नरः ।
होमे तु चतुरस्रं स्यात्कुण्डं सर्वाङ्गसुन्दरम् ॥ १२९॥
प्रतिनाम प्रजुहुयादुक्तद्रव्येण पण्डितः ।
ततः प्रयोगान्कारयेद्वाञ्छितार्थसमृद्धिदान् ॥ १३०॥
करभैरयुतं हुत्वा कवितामाप्नुयाद्व्रती ।
कमलैरचलां लक्ष्मीं वटकैरन्नसम्पदाम् ॥ १३१॥
हरिद्राक्तान्धसा वश्यं जगदेतच्चराचरम् ।
निम्बपत्रकटुस्नेहराजि कालवणैर्नरः ॥ १३२॥
हुत्वा मारयति क्षिप्रं वैरिणो दुर्जनानपि ।
सिन्दुरादेस्तु होमेन मोहयेदीप्सिताङ्गनाम् ॥ १३३॥
वादेषु स्तम्भयेद्वाचं शत्रूणां दधिहोमतः ।
तत्तद्रोगोक्तभैषज्यैस्तत्तद्रोगप्रणुत्तये ॥ १३४॥
डाकिनीग्रहभूतादेः प्रशान्त्यै माषहोमतः ।
प्रत्यहं यः पठेदेतन्मनुजः सुसमाहितः ॥ १३५॥
वत्सरानन्तरं तस्य दर्शनादेव भूभुजः ।
वशीभवन्ति सहसा सामात्याः किङ्करा इव ॥ १३६॥
स्थिरीभवति तद्गेहे चञ्चलापि त्वचञ्चला ।
मासत्रयस्य पठनादपस्मारादयो गदाः ॥ १३७॥
नश्यन्त्येव न सन्देहः सत्यं मम वचो यदि ।
निर्धनो धनमाप्नोति सुतार्थी लभते सुतान् ॥ १३८॥
यद्यत्कार्यं समुद्दिश्य पठेदेतदवाप्नुयात् ।
नारीभये वह्निभये भूमिपालभयेऽपि च ॥ १३९॥
परिपन्थिभये घोरे महासङ्ग्रामसङ्कटे ।
अरण्यसङ्कटे चैव पठेत्रिस्त्रिरनन्यधीः ॥ १४०॥
तत्तद्भयात्प्रमुच्येत सत्यं सत्यं सुरेश्वरि ।
इदं रहस्यं परमं पवित्रं पापनाशनम् ॥ १४१॥
अपमृत्योश्च शमनं सर्वाऽमङ्गलनाशनम् ।
बन्दीप्रमोचनं पुंसां दुःस्वप्नविनिवारणम् ॥ १४२॥
शृणु पार्वति यत्नेन विशेषेणास्य यत्फलम् ।
अलौहप्रहरणं सूक्ष्मं महाक्लेशनिवारणम् ॥ १४३॥
स्तोत्रमेतत्परिध्वंसे शस्त्रं हि मम प्रेरितम् ।
तथा वशीकरं राज्ञामप्रयोगमचूर्णकम् ॥ १४४॥
तथापस्मारभूतादेर्नाशनं वाथ नौषधम् ॥ १४५॥
इति श्रीहरिकृष्णविनिर्मिते बृहज्ज्योतिषार्णवे धर्मस्कन्धे
उपसनास्तबके श्रीबटुकभैरवोपासनाध्याये
श्रीबटुकभैरवसहस्रनामस्तोत्रनिरूपणं नाम प्रकरणं नवमम् ॥ ९॥
Proofread by Rajesh Thyagarajan