Bhrigumaharshikritam Karunabhyudayam Nama Shiva Stotram

 भृगुमहर्षिकृतं करुणाभ्युदयं नाम शिवस्तोत्रम् 

भृगुरुवाच ।
प्रणिपत्य भूतनाथं भवोद्भवं त्वामहं दिव्यरूपम् ।
भवातीतो भुवनपते प्रभो तु विज्ञापये किञ्चित् ॥ ३४॥

त्वद्गुणनिकरान्वक्तुं कः शक्तो भवति मानुषो नाम ।
वासुकिरपि हि कदाचिद्वदनसहस्रं भवेद्यस्य ॥ ३५॥

भक्त्या तथाऽपि शङ्कर भुवनपते त्वत्स्तुतौ मुखरः ।
वदतः क्षमस्व भगवन्प्रसीद मे तव चरणपतितस्य ॥ ३६॥

सत्त्वं रजस्तमस्त्वं स्थित्युत्पत्त्योर्विनाशने देव ।
त्वां मुक्त्वा भुवनपते भुवनेश्वर नैव दैवतं किञ्चित् ॥ ३७॥

यमनियमयज्ञदानवेदाभ्यासाश्च धारणा योगः ।
त्वद्भक्तेः सर्वमिदं नार्हति हि कलासहस्रांशम् ॥ ३८॥

उच्छिष्टरसरसायनखड्गाञ्जनपादुकाविवरसिद्धिर्वा ।
चिह्नं भवव्रतानां दृश्यति चेह जन्मनि प्रकटम् ॥ ३९॥

शाठ्येन नमति यद्यपि ददासि त्वं भूतिमिच्छतो देव ।
भक्तिर्भवभेदकरी मोक्षाय विनिर्मिता नाथ ॥ ४०॥

परदारपरस्वरतं परपरिभवदुःखशोकसन्तप्तम् ।
परवदनवीक्षणपरं परमेश्वरं मां परित्राहि ॥ ४१॥

मिथ्याभिमानदग्धं क्षणभङ्गुरदेहविलसितं क्रूरम् ।
कुपथाभिमुखं पतितं त्वं मां पापात्परित्राहि ॥ ४२॥

दीने द्विजगणसार्थे बन्धुजनेनैव दूषिता ह्याशा ।
तृष्णा तथाऽपि शङ्कर किं मूढं मां विडम्बयति ॥ ४३॥

तृष्णां हरस्व शीघ्रं लक्ष्मीं प्रदत्स्व यावदासिनीं नित्यम् ।
छिन्धि मदमोहपाशानुत्तारय मां महादेव ॥ ४४॥

करुणाभ्युदयं नाम स्तोत्रमिदं सर्वसिद्धिदं दिव्यम् ।
यः पठति भक्तियुक्तस्तस्य तुष्येद्भृगोर्यथा च शिवः ॥ ४५॥

इति मत्स्यपुराणे त्रिनवत्यधिकशततमाध्यायान्तर्गतं
         भृगुमहर्षिकृतं करुणाभ्युदयं नाम शिवस्तोत्रं समाप्तम् ।

मत्स्यपुराण । अध्याय १९३/३४-४५॥


matsyapurANa . adhyAya 193/34-45..

Proofread by PSA Easwaran