भटैः कृता शिवस्तुतिः
(शिवरहस्यान्तर्गते उग्राख्ये)
नमस्ते पार्वतीनाथ करुणाकर शङ्कर ।
नमस्ते देवदेवेश भगवन्भक्तवत्सल ॥ ३३२॥
नमस्ते विश्ववन्द्येश मधुसूदनपूजित ।
नमस्ते सोमसूर्याग्निनयनामितविक्रम ॥ ३३३॥
नमस्ते विमलाकार निराकार महेश्वर ।
नमस्ते निर्गुणानन्द भक्तानन्दप्रदायक ॥ ३३४॥
नमस्ते जगदाधार निराधार महेश्वर ।
नमस्ते ब्रह्मविष्ण्वादिदेवाराध्याध्वरप्रिय ॥ ३३५॥
नमस्ते चन्द्रचूडेश चन्द्रवर्णामितप्रभ ।
नमस्ते मन्मथाराते दक्षाध्वरविनाशक ॥ ३३६॥
नमस्ते वेदवेदान्तप्रतिपादितवैभव ।
नमस्ते गिरिजाबन्धो दयासिन्धो बुधोत्तम ॥ ३३७॥
नमस्ते भूतिमद्बन्धो भूतिभूषण भूतिद ।
नमस्ते सर्ववेदेड्य सर्वदेवनमस्कृत ॥ ३३८॥
नमस्ते सर्वभूतेश सर्वभूतनमस्कृत ।
नमस्ते सर्वभूतादिसृष्टिस्थित्यन्तकारण ॥ ३३९॥
॥ इति शिवरहस्यान्तर्गते भटैः कृता शिवस्तुतिः सम्पूर्णा ॥
- ॥ श्रीशिवरहस्यम् । उग्राख्यः सप्तमांशः । अध्यायः २६ कुम्भघोणमहिमानुवर्णनम् । ३३२-३३९॥
- .. shrIshivarahasyam . ugrAkhyaH saptamAMshaH . adhyAyaH 26 kumbhaghoNamahimAnuvarNanam . 332-339..
Proofread by Ruma Dewan