भगीरथकृतं २ शिवस्तोत्रम्
भगीरथ उवाच ।
प्रणमामि जगन्नाथं प्रणतार्तिप्रणाशनम् ।
प्रमाणागोचरं देवमीशानं प्रणवात्मकम् ॥ १६-७८॥
जगद्रूपमजं नित्यं सर्गस्थित्यन्तकारणम् ।
विश्वरुपं विरुपाक्षं प्रणतोऽस्म्युग्ररेतसम् ॥ १६-७९॥
आदिमध्यान्तरहितमनन्तमजमव्ययम् ।
समामनन्ति योगीन्द्रास्तं वन्दे पुष्टिवर्धनम् ॥ १६-८०॥
नमो लोकाधिनाथाय वञ्चते परिवञ्चते ।
नमोऽस्तु नीलग्रीवाय पशूनां पतये नमः ॥ १६-८१॥
नमश्चैतन्यरूपाय पुष्टानां पतये नमः ।
नमोऽकल्पप्रकल्पाय भूतानां पतये नमः ॥ १६-८२॥
नमः पिनाकहस्ताय शूलहस्ताय ते नमः ।
नमः कपालहस्ताय पाशमुद्गरधारिणे ॥ १६-८३॥
नमस्ते सर्वभूताय घण्टाहस्ताय ते नमः ।
नमः पञ्चास्यदेवाय क्षेत्राणां पतये नमः ॥ १६-८४॥
नमः समस्तभूतानामादिभूताय भूभृते ।
अनेकरूपरुपाय निर्गुणाय परात्मने ॥ १६-८५॥
नमो गणाधिदेवाय गणानां पतये नमः ।
नमो हिरण्यगर्भाय हिरण्यपतये नमः ॥ १६-८६॥
हिरण्यरेतसे तुभ्यं नमो हिरण्यबाहवे ।
नमो ध्यानस्वरूपाय नमस्ते ध्यानसाक्षिणे ॥ १६-८७॥
नमस्ते ध्यानसंस्थाय ध्यानगम्याय ते नमः ।
येनेदं विश्वमखिलं चराचरविराजितम् ॥ १६-८८॥
वर्षेवाभ्रेण जनितं प्रधानपुरुषात्मना ॥ १६-८९॥
स्वप्रकाशं महात्मानं परं ज्योतिः सनातनम् ।
यमामनन्ति तत्त्वज्ञाः सवितारं नृचक्षुषाम् ॥ १६-९०॥
उमाकान्तं नन्दिकेशं नीलकण्ठं सदाशिवम् ।
मृत्युञ्जयं महादेवं परात्परतरं विभुम् ॥ १६-९१॥
परं शब्दब्रह्मरुपं तं वन्देऽखिलकारणम् ।
कपर्द्दिने नमस्तुभ्यं सद्योजाताय वै नमः ॥ १६-९२॥
भवोद्भवाय शुद्धाय ज्येष्ठाय च कनीयसे ।
मन्यवे त इषे त्रय्याः पतये यज्ञतन्तवे ॥ १६-९३॥
ऊर्जे दिशां च पतये कालायाघोररूपिणे ।
कृशानुरेतसे तुभ्यं नमोऽस्तु सुमाहात्मने ॥ १६-९४॥
यतः समुद्राः सरितोऽद्रयश्च गन्धर्वयक्षासुरसिद्धसङ्घाः ।
स्थाणुश्चरिष्णुर्महदल्पकं च असच्च सज्जीवमजीवमास ॥ १६-९५॥
नतोऽस्मि तं योगिनताङ्घ्रिपद्मं सर्वान्तरात्मानमरूपमीशम् ।
स्वतन्त्रमेकं गुणिनां गुणं च नमामि भूयः प्रणमामि भूयः ॥ १६-९६॥
इत्थं स्तुतो महादेवः शङ्करो लोकशङ्करः ।
आविर्बभूव भृपस्य सन्तप्ततपसोऽग्रतः ॥ १६-९७॥
इति नारदपुराणे पूर्वभागे षोडशाध्यायान्तर्गतं
भगीरथकृतं शिवस्तोत्रं समाप्तम् ।
बृहन्नारदीयपुराण । पूर्वभाग । अध्याय १६/७८-९६॥
bRRihannAradIyapurANa . pUrvabhAga . adhyAya 16/78-96..
Proofread by PSA Easwaran