Brahmana Kritam 04 Shiva Stotram

ब्रह्मणा कृतं ४ शिवस्तोत्रम्

ब्रह्मोवाच । नमस्तेऽस्तु महादेव भूतभव्य भवाश्रय । नमस्ते स्तुतिनित्याय नमस्त्रैलोक्यपालिने ॥ ११॥ नमः पवित्रदेहाय सर्वकल्मषनाशिने । चराचरगुरो गुह्यगुह्यानां च प्रकाशकृत् ॥ १२॥ रोगा न यान्ति भिषजैः सर्वरोगविनाशन । रौरवाजिनसंवीत वीतशोक नमोऽस्तु ते ॥ १३॥ वारिकल्लोलसङ्क्षुब्धमहाबुद्धिविघट्टिने । त्वन्नामजापिनो देव न भवन्ति भवाश्रयाः ॥ १४॥ नमस्ते नित्यनित्याय नमस्त्रैलोक्यपालन । शङ्करायाप्रमेयाय व्याधीनां शमनाय च ॥ १५॥ परायापरिमेयाय सर्वभूतप्रियाय च । योगेश्वराय देवाय सर्वपापक्षयाय च ॥ १६॥ नमः स्थाणवे सिद्धाय सिद्धवन्दिस्तुताय च । भूतसंसारदुर्गाय विश्वरूपाय ते नमः ॥ १७॥ फणीन्द्रोक्तमहिम्ने ते फणीन्द्राङ्गदधारिणे । फणीन्द्रवरहाराय भास्कराय नमो नमः ॥ १८॥ इति वामनपुराणे एकोननवतितमाध्यायान्तर्गतं ब्रह्मणा कृतं शिवस्तोत्रं समाप्तम् । वामनपुराण । अध्याय ४९/११-१८॥ vAmanapurANa . adhyAya 49/11-18.. Proofread by PSA Easwaran