Brahmana Kritam 09 Shiva Stotram

ब्रह्मणा कृतं ९ शिवस्तोत्रम्

ब्रह्मोवाच । देवदेव महादेव भक्तानुग्रहकारक । प्रसीद परमेशान सर्वदेवहितप्रद ॥ १२॥ प्रसीद जगतां नाथ प्रसीदानन्ददायक । प्रसीद शङ्कर स्वामिन् प्रसीद परमेश्वर ॥ १३॥ ॐ काराय नमस्तुभ्यमाकारपरतारक । प्रसीद सर्वदेवेश त्रिपुरघ्न महेश्वर ॥ १४॥ नानावाच्याय देवाय वरणप्रिय शङ्कर । अगुणाय नमस्तुभ्यं प्रकृतेः पुरुषात्पर ॥ १५॥ निर्विकाराय नित्याय नित्यतृप्ताय भास्वते । निरञ्जनाय दिव्याय त्रिगुणाय नमोऽस्तु ते ॥ १६॥ सगुणाय नमस्तुभ्यं स्वर्गेशाय नमोऽस्तु ते । सदाशिवाय शान्ताय महेशाय पिनाकिने ॥ १७॥ सर्वज्ञाय शरण्याय सद्योजाताय ते नमः । वामदेवाय रुद्राय तदाप्यपुरुषाय च ॥ १८॥ अघोराय सुसेव्याय भक्ताधीनाय ते नमः । ईशानाय वरेण्याय भक्तानन्दप्रदायिने ॥ १९॥ रक्ष रक्ष महादेव भीतान्नस्सकलामरान् । दग्ध्वा च त्रिपुरं सर्वे कृतार्था अमराः कृताः ॥ ५.११.२०॥ स्तुत्वैवं देवतास्सर्वा नमस्कारं पृथक्पृथक् । चक्रुस्ते परमप्रीता ब्रह्माद्यास्तु सदाशिवम् ॥ २१॥ इति शिवपुराणे रुद्रसंहितायां युद्धखण्डे एकादशाध्यायान्तर्गतं ब्रह्मणा कृतं शिवस्तोत्रं समाप्तम् । शिवपुराण । रुद्रसंहिता । युद्धखण्ड । अध्याय ११/१२-२०॥ shivapurANa . rudrasaMhitA . yuddhakhaNDa . adhyAya 11/12-20.. Proofread by PSA Easwaran