Brahma Kritam Shivalinga Stotram

ब्रह्मकृतं शिवलिङ्गस्तोत्रम्

ब्रह्मोवाच । नमस्ते दिव्यरूपाय नमस्ते बहुरूपिणे । नमोऽविषह्यवीर्याय नमो विश्वक्रियात्मने ॥ २१॥ नमः पिङ्गकपर्द्दाय नमः खण्डेन्दुधारिणे । नमः कनकवर्णाय नमो वननिवासिने ॥ २२॥ वन्दे त्वां भूतभर्त्तारं सदा शत्रुविनाशनम् । रणत्कनककेयूरं धृतपूर्णेन्दुमण्डलम् ॥ २३॥ वन्दे त्वां त्रिदशाध्यक्षं विश्वाध्यक्षं महेश्वरम् । क्षीणसंसारदुःखौघं मुनिध्यातपदं सदा ॥ २४॥ वन्दे त्वां सर्वदा देवं दैत्यसङ्घातनाशनम् । टङ्कपट्टिशशूलाग्रधनुःखड्गगदाधरम् ॥ २५॥ इति श्रीस्कन्दपुराणे आवन्त्यखण्डे चतुरशीतिलिङ्गमाहात्म्ये पञ्चषष्टितमाध्यायान्तर्गतं ब्रह्मकृतं शिवलिङ्गस्तोत्रं समाप्तम् । स्कन्दपुराण । आवन्त्यखण्ड । चतुरशीतिखण्ड । अध्याय ६५/२१-२५॥ skandapurANa . AvantyakhaNDa . chaturashItikhaNDa . adhyAya 65/21-25.. Proofread by PSA Easwaran