ब्रह्मकृतं ७ शिवस्तोत्रम्
ब्रह्मोवाच ।
(बुधेश्वर लिङ्ग, ओङ्कारेश्वर लिङ्ग)
नम ओङ्काररूपाय नमोऽक्षरवपुर्धृते ।
नमोऽकारादिवर्णानां प्रभवाय सदाशिव ॥ १०१॥
अकारस्त्वमुकारस्त्वं मकारस्त्वमनाकृते ।
ऋग्यजुः सामरूपाय रूपातीताय ते नमः ॥ १०२॥
नमो नादात्मने तुभ्यं नमो बिन्दुकलात्मने ।
अलिङ्गलिङ्गरूपाय सर्वरूपस्वरूपिणे ॥ १०३॥
नमस्ते धामनिधये निधनादिविवर्जित ।
नमो भवाय रुद्राय शर्वाय च नमोऽस्तुते ॥ १०४॥
नम उग्राय भीमाय पशूनां पतये नमः ।
नमस्तारस्वरूपाय सम्भवाय नमोऽस्तु ते ॥ १०५॥
अमायाय नमस्तुभ्यं नमः शिवतराय ते ।
कपर्दिने नमस्तुभ्यं शितिकण्ठ नमोऽस्तु ते ॥ १०६॥
मीढुष्टमाय गिरिश शिपिविष्टाय ते नमः ।
नमोऽह्रस्वाय खर्वाय बृहते वृद्धरूपिणे ॥ १०७॥
कुमारगुरवे तुभ्यं कुमारवपुषे नमः ।
नमः श्वेताय कृष्णाय पीतायारुणमूर्तये ॥ १०८॥
धूम्रवर्णाय पिङ्गाय नमः किर्मीरवर्चसे ।
नमः पाटलवर्णाय नमो हरिततेजसे ॥ १०९॥
नानावर्णस्वरूपाय वर्णानां पतये नमः ।
नमस्ते स्वररूपाय नमो व्यञ्जनरूपिणे ॥ २.७३.११०॥
उदात्तायानुदात्ताय स्वरिताय नमो नमः ।
ह्रस्वदीर्घप्लुतेशाय सविसर्गाय ते नमः ॥ १११॥
अनुस्वारस्वरूपाय नमस्ते सानुनासिक ।
नमो निरनुनासाय दन्त्यतालव्यरूपिणे ॥ ११२॥
ओष्ठ्योरस्यस्वरूपाय नम ऊष्मस्वरूपिणे ।
अन्तस्थाय नमस्तुभ्यं पञ्चमाय पिनाकिने ॥ ११३॥
निषादाय नमस्तुभ्यं निषादपतये नमः ।
वीणावेणुमृदङ्गादि वाद्यरूपाय ते नमः ॥ ११४॥
नमस्ताराय मन्द्राय घोरायाघोरमूर्तये ।
नमस्तानस्वरूपाय मूर्च्छनापतये नमः ॥ ११५॥
स्थायिसञ्चारिभेदेन नमो भावस्वरूपिणे ।
तालप्रियाय तालाय लास्यताण्डवजन्मने ॥ ११६॥
तौर्यत्रिकस्वरूपाय तौर्यत्रिकमहाप्रिय ।
तौर्यत्रिककृतां भक्त्या निर्वाणश्रीप्रदायक ॥ ११७॥
स्थूलसूक्ष्मस्वरूपाय दृश्यादृश्यस्वरूपिणे ।
अर्वाचीनाय च नमः पराचीनाय ते नमः ॥ ११८॥
वाक्प्रपञ्चस्वरूपाय वाक्प्रपञ्चपराय च ।
एकायानेकभेदाय सदसत्पतये नमः ॥ ११९॥
शब्दब्रह्म नमस्तुभ्यं परब्रह्म नमोऽस्तुते ।
नमो वेदान्तवेद्याय वेदानां पतये नमः ॥ २.७३.१२०॥
नमो वेदस्वरूपाय वेदगोचरमूर्तये ।
पार्वतीश नमस्तुभ्यं जगदीश नमोऽस्तु ते ॥ १२१॥
नमस्ते देवदेवेश देव दिव्यपदप्रद ।
शङ्कराय नमस्तुभ्यं नमस्तुभ्यं महेश्वर ॥ १२२॥
नमस्ते जगदानन्द नमस्ते शशिशेखर ।
मृत्युञ्जय नमस्तुभ्यं नमस्ते त्र्यम्बकाय च ॥ १२३॥
नमः पिनाकहस्ताय त्रिशूलायुधधारिणे ।
नमस्त्रिपुरहन्त्रे च नमोऽन्धक निषूदन ॥ १२४॥
कन्दर्पदर्पदलन नमो जालन्धरारये ।
कालाय कालकालाय कालकूटविषादिने ॥ १२५॥
विषादहन्त्रे भक्तानामभक्तैकविषादद ।
ज्ञानाय ज्ञानरूपाय सर्वज्ञाय नमोऽस्तुते ॥ १२६॥
योगसिद्धिप्रदोऽसि त्वं योगिनां योगसत्तम ।
तपसां फलदोऽसि त्वं तपस्विभ्यस्तपोधन ॥ १२७॥
त्वमेव मन्त्ररूपोऽसि मन्त्राणां फलदो भवान् ।
महादानफलं त्वं वै महादानप्रदो भवान् ॥ १२६॥
महायज्ञस्त्वमेवेश महायज्ञफलप्रद ।
त्वं सर्वः सर्वगस्त्वं वै सर्वदः सर्वदृग्भवान् ॥ १२९॥
सर्वभुक्सर्वकर्ता त्वं सर्वसंहारकारक ।
योगिनां हृदयाकाश कृतालय नमोऽस्तु ते ॥ २.७३.१३०॥
त्वमेव विष्णुरूपेण शङ्खचक्रगदाधरः ।
त्रिलोकीं त्रायसे त्रातः सत्त्वमूर्ते नमोऽस्तु ते ॥ १३१॥
त्वमेव विदधास्येतद्विधिर्भूत्वा विधानवित् ।
रजोरूपं समालम्ब्य नीरजस्कपदप्रद ॥ १३२॥
त्वमेव हि महारुद्रस्त्वं महोग्रो भुजङ्गभृत् ।
त्वमेव हि महाभीमो महापितृवनेचर ॥ १३३॥
तामसीं तनुमाश्रित्य त्वं कृतान्त कृतान्तक ।
कालाग्निरुद्रो भूत्वान्ते त्वं संवर्तप्रवर्तकः ॥ १३४॥
त्वं पुम्प्रकृतिरूपाभ्यां महदाद्यखिलं जगत् ।
अक्षिपक्ष्मसमुत्क्षेपात्पुनराविःकरोष्यज ॥ १३५॥
उन्मेषविनिमेषौ ते सर्गासर्गैककारणम् ।
कपालमालाखेलोऽयं भवतः स्वैरचारिणः ॥ १३६॥
त्वत्कण्ठे नृकरोटीयं धूर्जटे या विभासते ।
सर्वेषामन्तदग्धानां सा स्फुटं बीजमालिका ॥ १३७॥
त्वत्तः सर्वमिदं शम्भो त्वयि सर्वं चराचरम् ।
कस्त्वां स्तोतुं विजानाति पुरां वाचामगोचरम् ॥ १३८॥
स्तोता त्वं हि स्तुतिस्त्वं हि नित्यं स्तुत्यस्त्वमेव च ।
वेद्म्यों नमः शिवायेति नान्यद्वेऽद्म्येव किञ्चन ॥ १३९॥
त्वमेव हि शरण्यं मे त्वमेव हि गतिः परा ।
त्वामेव प्रणमामीश नमस्तुभ्यं नमो नमः ॥ २.७३.१४०॥
इति श्रीस्कादपुराणे काशीखण्डे पूर्वार्द्धे त्रिसप्ततितमा- ध्यायान्तर्गतं
ब्रह्मकृतं शिवस्तोत्रं समाप्तम् ।
स्कन्दपुराण । काशीखण्ड । उत्तरखण्ड । अध्याय ७३/१०१-१४०॥
skandapurANa . kAshIkhaNDa . uttarakhaNDa . adhyAya 73/101-140..
Proofread by PSA Easwaran