Brahmakritam 08 Shiva Stotram

ब्रह्मकृतं ८ शिवस्तोत्रम्

ब्रह्मोवाच । नमः शिवायामलसत्त्वचेतसे गुणत्रयातीतविसारितेजसे । षडङ्गवेदस्य ममापि वेधसे परस्वरूपानुभवाय चक्षुषे ॥ १३॥ नमोऽ स्तु ते सृष्टिविधौ रजोजुषे जगत्स्थितौ सत्त्वमधिष्ठिताय ते । विनाशहेतौ तमसा महीयसे शिवाय निर्वाणसुखप्रदायिने ॥ १४॥ अशेषभूतप्रकृतेः पराय वै परात्मरूपाय नमः शिवाय वै । नृबुद्ध्यहङ्कारमनोविधायिने भर्त्रे च षड्विंशकरूपकाय वै ॥ १५॥ भूतोयवह्न्यम्बरवायुचन्द्रसूर्यात्मरूपाभिरिदं तनूभिः । व्याप्तं जगद्यस्य नमोऽस्तु तस्मै भूतं भविष्यमथ वर्तमानम् ॥ १६॥ यानीह तेजांसि जगन्ति यानि भूतानि भव्यान्यथ कारणानि । भवन्ति सृष्टौ विलयं विनाशे व्रजन्ति यस्यात्मनि तं नमामि ॥ १७॥ इति श्रीस्कन्दपुराणे आवन्त्यखण्डे अवन्तीक्षेत्रमाहात्म्ये द्वितीयाध्यायान्तर्गतं ब्रह्मकृतं शिवस्तोत्रं समाप्तम् । स्कन्दपुराण । आवन्त्यखण्ड । आवन्त्यखण्ड । अध्याय २/१३-१७॥ skandapurANa . AvantyakhaNDa . AvantyakhaNDa . adhyAya 2/13-17.. Proofread by PSA Easwaran